Partisipantenan na e di tres edishon di e kurso di kòmpiuter “Klek i Taip: e Base” ku a kuminsá dia 9 di yanüari 2023 a risibí un sertifikado pa motibu ku nan a finalisá e kurso. Durante e kurso di kòmpiuter nan a sera konosí ku kòmpiuter riba nivel básiko. E partisipantenan na e kurso tabata interesadonan ku a tuma kontakto ku Biblioteka Públiko Boneiru. E enkuentronan tabata na enkargo di studiantenan di MBO-ICT.
Ku e kurso di kòmpiuter nan a trein abilidatnan básiko di kòmpiuter i nan a trein tambe kon pa traha un sita riba www.bonairegov.com. Durante e kurso a trata pregunta manera ‘Kon mi ta sende un kòmpiuter? Kon mi por taip? Kon mi ta manda un email?’. E kurso a konsistí di en total sinku enkuentro. Di e manera akí e partisipantenan a hasi pasonan chikitu, despues di kua kada biaha nan por a anda mas miho ku un kòmpiuter. Por pensa akí riba trámitenan manera sende kòmpiuter, siña taip i traha ku e ‘muis’. E partisipantenan mas avansá a trein tambe ku manda email i hasi uso seif di internèt. Na final Biblioteka Públiko Boneiru den koperashon ku departamento di ICT di Entidat Públiko Boneiru a regalá tur hende ku a partisipá na e tres kursonan un kòmpiuter. Di e manera akí e personanan ku a partisipá por keda apliká loke nan a siña durante e kurso.
Un di e tareanan di Biblioteka Públiko Boneiru ta pa ofresé desaroyo i edukashon. Pa por sòru pa suidadonan outosufisiente den nos komunidat digital, Biblioteka Públiko Boneiru ta fasilitá e kurso di kòmpiuter Klek i Taip. Ku e kurso Klek i Taip e partisipantenan ta mehorá nan abilidatnan básiko di kòmpiuter. Otro tareanan di biblioteka ta: ofresé konosementu i informashon, stimulá lesamentu, organisá enkuentro i debate i laga sera konosí ku literatura, arte i kultura.
Biblioteka Públiko Boneiru ta tene kuenta ku digitalisashon kontinuo di nos komunidat pa medio di brinda informashon i treinen na komunidat. Pa mas informashon tokante e posibilidatnan por tuma kontakto ku Biblioteka Públiko Boneiru via 715 – 5344 òf pasa personalmente na Kaya Gramèl s/n.
