Nos ta bibando den un tempo caminda malo ta wordo yama bon y bon ta wordo yama malo.
Caminda hende no kier respeta ley , no ta respeta Dios, y ta sostene maldad..
Beibel a avisa nos hopi cla, cu hopi su fe lo fria y lo no rechasa pica, pero pa keda bon cu hende nan lo tolera maldad.
Pero nos mester para firme, pasobra nos bida di oracion ta mantene nos firme den Señor.
Pasobra aunke nos no ta mira Dios, Dios a demostra di ta Firme, Fiel, Berdadero y Capas.
Nos no ta mira Dios pero nos ta kere den Dios, y Dios ta haci milager, nos ta menciona su nomber y su presencia ta rondona nos.
Pesey nos mester mantene nos fe den Dios, pasobra sin Fe ta imposibel agrada Dios.( Hebreonan 11:6).
Nos mester tin fe pa haci oracion,
Nos mester tin fe pa sirbi Dios,
Nos mester tin fe pa demostra cu nos ta yuinan di Dios.
Tur e maldad y inmoralidad cu ta lanta cabes den tur forma, ta demostra nos cu nos mester perservera den oracion tur momento.
Pasobra pa libertad Cristo a yama nos, y nos tin di tene cuidao pa no cay bek den yugo di sclavitud.
Laga nos no haci libertinahe di nos libertad, pensando cu nos por haci tur cos y participa den tur cos, nos mester para firme , pasobra awendia ta masha facil pa wordo contamina.
E enemigo ta un mentiroso, y ta hopi ta cay den su trampa, birando temporadista di paranda y bebemento, lujuria y perversidad, y ta lubida cu Cristo ta bini manera un ladron den anochi. ( Lucas 21:34-36).
Nos mester para firme den Señor pasobra aunke nos ta cana den carni, nos no ta bataya segun carni.
Pasobra e armanan cu nos ta bataya cune no ta carnal pero poderoso den Dios pa basha fortinan abao.
E armanan cu nos tin ta nos oracion. ayuno, alabansa y adoracion, humildad, aparta for di pica, pordona otro,y riba tur cos e nomber di Cristo Hesus mester wordu halsa pa asina fortinan di e enmigo lo basha abao..
Y pa destrui speculacion y tur arogancia, cu ta wordo lanta contra e conocemento di Dios, hibando den cautiverio tur pensamento , pa haci nan obedecido na Cristo.( 2 Corintionan 10;3-6).
Cuanto arogancia no ta wordo demostra tur dia contra e palabra di Dios, cuanto rebeldia nos no ta mira tur momento.
Cada biaha cu nos ta orguyoso y arogante contra e palabra di Dios, y apoyando inmoralidad concientemente , nos a drenta un tereno hopi peligroso, pasobra nos ta lantando furia di Dios.
Ta masha peligroso pa reta Dios, pasobra ta para scirbi cu cabesura, capricho y un curazon cu no kier arepenti ta montona furia di Dios riba nos bida.( Romanonan 2;5).
Pesey nos mester biba obediente y someti totalmente na Dios, pasobra mescos cu Dios ta fiel na nos, nos mester ta fiel na Dios.
E tempo ta dificil y trabahoso, pesey den e tempo aki nos mester evangelisa, rescata, y ranca hende for di man di e enemigo, pasobra nos tur sa cu e diabel ta un gran probechador di esnan cu no conoce Dios y tambe esnan cu ta rechasa e Luz y nan kier biba den scuridad.
Nos no por tapa solo cu un dede, y sera wowo pa tur locual ta pasando, pero awor mas cu nunca nos oracion mester aumenta, pa asina hendenan por wordo libera for di cadena di maldad.
Sea alerta , para firme den fe , actua manera homber , sea fuerte.( 1 Corintionan 16:13).
