Lo libera fondonan den presupuesto di DOW 2023 pa pone asfalt riba nos careteranan
Durante presupuesto di DOW 2023, Minister President Evelyn Wever-Croes a señala cu RWZI lo wordo privatisa pa WEB Aruba NV den e prome kwartaal di 2023. Sinembargo den presupuesto di DOW 2023, un suma basta grandi a wordo presupuesta pa sigui e trabaonan di mehoracion y inovacion di RWZI. Mirando cu ora e traspaso aki tuma lugar e placa presupuesta pa RWZI lo keda den e presupuesto 2023 di DOW, esaki lo por tin un otro proposito y destino. Durante di nos preguntanan riba e suma di placa aki Minister President Evelyn Wever-Croes a clarifica cu lo uza un gran parti di e suma aki pa asfalta nos careteranan den necesidad urgente y pa pone mas sleeping police.
Esaki riba su mes ta un tremendo noticia! Mirando cu nos a pasa den un pandemia di Maart 2020 pa mas o menos Maart 2022, luna den cual tabata implementando un exit strategy for di e pandemia di Covid, no tabata tin fondo pa drecha nos careteranan. Nos situacion economico delicado causa pe megadebe di AVP y e debe cu Hulanda pa via di e Covid-19, a haci tambe cu CAFT y RMR a pone basta presion riba gobierno corta hopi gasto. E presion aki a cuminsa memey di pandemia! Te na e dia di awe e presion financiero aki ta existi. Pesey e extra fondo di asfalt aki ta mas cu welkom mirando cu nos camindanan no a mira mucho inversion ni drechamento den e ultimo 3 añanan pa motibo di loke mi a menciona anteriormente. Nos careteranan mester wordo drecha urgentemente ya cu tin hopi cu ta den mal estado y mester di atencion rapido.
Ademas ora mi a post riba mi facebook page cu lo drecha henter e caminda entre Tanki Leendert y Tanki Flip, ma haya hopi comentarionan y peticion pa drecha otro camindanan tambe. Como sirbidor di pueblo mesora ma tuma nota di esakinan, hunto cu algun otronan cu mi mes por a observa, y a traha preguntanan y sugerencianan pa nos Minister President pa tuma na cuenta di e peticionan di pueblo. Adhunto por wak e pregunta y sugerencianan aki cu a bay di un forma oficial via di Parlamento di Aruba pa Minister President Evelyn Wever Croes. Mi lo ta den espera pa por haya e contestacion di Minister President pronto y sigui informa pueblo.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
