Den e sentensia aki, Korte ta evaluá e apelashon hasí dor di e demandante
kontra di e desishon di SVB pa pone un fin na e relashon hurídiko eksistente
entre e demandante i SVB. SVB a tuma e desishon ei mirando ku e demandante
a pasa e edat di 65 aña dia promé di yanüari 2023. SVB no tabatin e derecho di
tuma e desishon aki. Na promé lugá, SVB no tin e outoridat legal pa pone un
fin na e relashon hurídiko ku e demandante dor ku esaki a alkansá e edat di 65
aña. Na di dos lugá, tin kuestion di diskriminashon di edat sin ku tin un
hustifikashon ophetivo pa esaki.
Dikon SVB no tin e outoridat legal pa tuma e desishon aki?
Promé di febrüari 2013 a introdusí e Ordenansa Nashonal tokante di Seguro
Médiko Básiko (Lv Bvz). A introdusí e ordenansa nashonal aki entre otro komo
parti di e proseso di reforma di kuido di salubridat debí na e situashon
finansiero di Pais Kòrsou. Pa yega na ahoro di kosto den kuido médiko a
elaborá i publiká, entre otro, e Ordenansa Nashonal Kriterionan Adishonal pa
Akuerdonan di Kuido (PB 2019, 28). Un di e kriterionan den e ordenansa aki ta
ku un profeshonal médiko individual lo no a alkansá e edat kaminda e derecho
di penshun di behes ta nase segun e Ordenansa Nashonal di Penshun di Behes
General (Lv AOV). E edat kaminda e derecho di penshun di behes ta nase,
manera indiká den e Lv AOV ta 65 aña. Artíkulo 7.1, insiso 4 di e Lv BVZ ta
definí eksplísitamente ku e kriterionan adishonal ku e akuerdonan di kuido
minimalmente tin ku kumpli kune, por solamente referí na akuerdonan di
kuido establesé después di e entrada na vigor di, den e kaso aki, e Ordenansa
Nashonal Kriterionan Adishonal pa Akuerdonan di Kuido. Te ku e momento
aki, SVB no a sera ningun akuerdo di kuido, ni tampoko ku e demandante.
Pues, SVB no tabata por a terminá e relashon hurídiko eksistente a base di e
ordenansa aki. E Areglo di Kolaborashon na Seguro Sosial 1960 no ta duna SVB
e outoridat pa terminá e relashon hurídiko ku e demandante pa e motibu ku el
a kumpli 65 aña.
2
Dikon por papia di diskriminashon di edat sin hustifikashon ophetivo?
Diskriminashon di edat prohibí ta eksistí si e aplikashon di esaki ta obligá SVB
pa trata kousanan igual di forma desigual sin un hustifikashon ophetivo
rasonabel. E aplikashon di un edat di penshun obligatorio ta un forma di
diskriminashon di edat. Ta bèrdat ku e demandante no ta empleado di SVB ku
mester bai ku penshun obligatoriamente, pero e demandante ta dependé pa
mayor parti den su praktèik di aseguradonan di SVB. En efekto, e lo no por
ehersé su praktèik di un manera rèndabel después di yega na e edat di 65 aña.
Lokual ku tin den enota di aklarashon, ta insufisiente pa konkluí ku e límite di
edat ta un rekurso adekuá i nesesario pa e metanan fihá dor di Pais Kòrsou den
kuido. Pues no tin hustifikashon ophetivo i rasonabel pa e distinshon ku e
límite di edat ta efektuá. Esaki no ta konta solamente den e kaso di e
demandante den su profeshon komo partera, pero tambe pa tur otro
profeshonal médiko den e sentido di LB nvz. Pa e rason ei, e ártikulo, insiso 1,
palabranan inisial i bou di c, di e Ordenansa Nashonal Kriterionan Adishonal
pa Akuerdonan di Kuido no ta vinkulante.
