Durante konstrukshon ta sera e área pa públiko
E trabounan pa konstruí un parke públiko na Sunset Beach, entre Chogogo Beach Resort i Den Laman Condominiums ta bai kuminsá definitivamente djaluna awor, 6 di febrüari 2023. Esaki ta enserá ku e siman akí mes lo sera e área di konstrukshon pa públiko, di manera ku no ta posibel pa hasi uso di e playa akí por lo pronto. E trabounan di konstrukshon lo bai dura aproksimadamente un aña. Esaki Adely Susana-Jansen, direktora di Bonaire Overheidsgebouwen NV (‘BOG’), a deklará na prensa den transkurso di djaweps.
Kontratistanan
Riba djaweps 19 di yanüari, den presensia di diputado James Kroon i Farley Virginia di Heren2, BOG a firma kontrato ku e tres kompanianan ku ta bai ehekutá e bunita proyekto aki. E kontratista prinsipal, responsabel pa ehekushon di e plan kompleto ta Bonaire Wegenbouw Maatschappij N.V. (BWM), supkontratista Elektropro B.V., ta responsabel pa tur loke ta trata e parti elektróniko, seguridat i di komunikashon i supkontratista APA Construction N.V., tin e parti di di konstrukshon di e edifisio di horeka na su enkargo. Banda di esakinan, BWM lo hasi uso di diferente kontratista lokal pa ehekutá i konstruí e diferente partinan di e parke, manera e palapanan i e área pa tene barbekiú.
‘Kick-off meeting’
Djaluna, 23 di yanüari 2023, a tuma lugá un asina yamá ‘kick-off meeting’ ku e kontratistanan i a palabrá ku e trabounan lo bai kuminsá djaluna awor. Tambe a palabrá ku promé ku e trabounan inisiá lo bai sera e área di konstrukshon pa públiko pa por kumpli ku normanan di seguridat e siman aki mes. Laman lo no ta aksesibel via di e área durante konstrukshon pa por garantisá siguridat di un i tur. BOG ta pidi koperashon di un i tur pa respetá e área di konstrukshon durante e periodo di konstrukshon.
Manera ta konosí na luna di sèptèmber aña pasá BOG a presentá e plan pa konstruí un parke di rekreo nobo na Sunset Beach, ku lo bai ofresé un gran kantidat di fasilidat, manera un ‘slipway’, un rampa pa personanan ku tin un inkapasidat físiko por baha den laman na un manera seif, palapa, kiosko i tualèt publiko. Ku áreanan di barbekiú, ehersisio i pa mucha lo kreá oportunidat di rekreo moderno i duradero i aksesibel pa personanan di tur edat.
