Ayera djaluna 30 di yanüari e partidonan polítiko ku ke partisipá na e elekshon(nan) a entregá nan lista di kandidato na Passangrahan. Na kaminda pa e elekshonnan ku ta tuma lugá dia 15 di mart 2023, tradishonalmente e momentu akí ta inisio di e periodo di kampaña promé ku elekshon. E partidonan ta hasi uso di e oportunidat pa kolektivamente entregá e lista di kandidato i e dokumentunan nesesario.
Seshon públiko di ofisina elektoral sentral
Despues ku riba djaluna 30 di yanüari e partidonan a entregá e listanan di kandidato i e dokumentunan korespondiente, seguidamente ofisina elektoral sentral ta investigá listanan di kandidato. Riba djabièrnè 3 di febrüari 2023 pa 17:00 or ofisina elektoral sentral ta bini huntu den seshon i konsekutivamente nan ta disidí si e listanan di kandidato ku a keda entregá pa elekshon di miembro di Konseho Insular di Entidat Públiko Boneiru i pa elekshon di miembro di Kolegio Elektoral ta bálido i nan ta duna e listanan un number. E seshon públiko akí ta tuma lugá den Passangrahan na Plasa Wilhelmina. Por sigui e seshon akí via ‘livestream’ riba Facebook i kanal di YouTube di Entidat Públiko Boneiru (gobièrnu di Boneiru). Despues di e seshon Entidat Públiko Boneiru ta pone e prosèsverbalnan i numerashon di e listanan di kandidato riba www.boneirutavota.com.
Banda di entrega di lista di kandidato i e seshon públiko di ofisina elektoral sentral tin algun fecha importante te na e stipulashon irevokabel.
Fecha importante despues di postulashon di kandidato:
- Djamars 31 di yanüari: ofisina elektoral sentral ta investigá e listanan di kandidato i e dokumentunan. Esaki ta tuma lugá den un seshon no-públiko pa 16:00 or. Despues di e seshon ofisina elektoral sentral ta anunsiá kua ta e partidonan ku a entregá un lista di kandidato i kiko ta e resultado di e investigashon akí.
- Djárason 1 i djaweps 2 di febrüari for di 09:00 or te 17:00 or: partidonan por drecha kualke omishon. Si durante investigashon di e listanan di kandidato resultá por ehèmpel ku tin informashon ku no ta kuadra kompletamente, òf ta falta deklarashon di sosten òf otro dokumentu, partidonan por drecha esaki.
- Djabièrnè 3 di febrüari 17:00 or: ofisina elektoral sentral ta tuma desishon tokante balides di e listanan di kandidato, e kandidatonan ku ta riba e listanan akí, i e denominashonnan (nòmber di e partidonan). Tambe ofisina elektoral sentral ta duna e listanan un number. Esaki ta tuma lugá den un seshon públiko.
- Dentro di kuater dia despues di e desishon tokante balides di e listanan di kandidato por hasi apelashon na Departamento di Hurisdikshon Atministrativo di Raad van State. Kontra numerashon di lista no tin apelashon posibel.
- Djaluna 13 di febrüari: veredikto di Raad van State. Despues di esei e listanan di kandidato ta irevokabelmente stipulá.