Henter comunidad ta cordialmente invita
Manera cu gobierno a bin ta anuncia, otro siman ta un siman historico pa Aruba pasobra lo ricibi bishita di Famia Real. Rey Willem Alexander, Reina Maxima y Prinses Amalia lo yega Aruba dialuna mainta dia 30 di januari. Desde cu nan yega nan lo bishita diferente sitio na Aruba, caminda cu pueblo lo tin e oportunidad pa saludanan. Dia 1 di februari lo dispidi di nan, pa nan sigui cu nan biahe pa Corsou.
Prome Minister Evelyn Wever – Croes durante di Conferencia di Prensa a elabora riba e bishita di Famia Real cu lo tuma luga otro siman dia 30 y 31 di januari. Dialuna unabes cu Rey Willem Alexander, Reina Maxima, y Prinses Amalia yega Aruba nan lo bay direccion Wilhelminapark caminda cu lo bay tin algun actividad. Na e ocasion tin scolnan invita, lo tin e militarnan cu lo haci un ‘erewacht’ den e parke, y despues nan ta bay na e cas ceremonial di Gobernador pa un encuentro. Unabes cu nan termina na gobernador, nan lo cana bay Parlamento caminda cu tambe lo tin un encuentro y despues nan ta sigui pa Bestuurskantoor pa un reunion cu Conseho di Minister di Aruba.
Na caminda, lo tin diferente presentacion di arte, canto y di baile pa e Famia Real experiencia Aruba su cultura. Prome Minister Evelyn Wever – Croes y henter pueblo di Aruba ta cordialmente invita pa ta presente riba e ruta pa duna Rey Willem Alexander, Reina Maxima, y Prinses Amalia bon bini.
Riba e mesun dia esta 30 di januari atardi, lo bay tin un actividad na San Nicolas caminda cu nan lo bishita Filomena College y mira un exposicion di Boy Ecury. Despues nan lo haci un recorido den e cayanan di San Nicolas pa mira algun di e pinturanan bunita cu tin riba e murayanan. Un bes mas, henter comunidad ta bon bin pa ta presente y pa saludanan. Despues lo tin un actividad prepara pa nan dilanti di Nicolaas Store pa e famia Real.
Prome Minister a sigui splica cu diamars dia 31 di januari, lo bay tin algun actividad mas chikito, unda cu pueblo un bes mas ta bon bini. Den oranan di mainta Prinses Amalia ta bishita Aruba Aloe Balm y despues e famia Real nan lo bishita Universidad di Aruba caminda lo tin un debate cu hobennan y combersacionnan riba diferente tema. Despues Rey Willem Alexander y Pinses Amalia lo bay Frans Figaroa, como cu Reina Maxima tin otro sitio pa atende. Diamars atardi, dia 31 lo bay tin un tremendo Bon Bini Festival y diferente actividad riba Plaza Padu dedica na e Famia Real cu ta di bishita. E anochi lo termina den Fort Zoutman pa nan experiencia e Bon Bini Festival cu nos ta custuma di dje. Asina lo percura pa Rey Willem Alexander, Reina Maxima, y Prinses Amalia experiencia Aruba y yega cerca di pueblo manera cu nan deseo ta. Diaranson mainta no lo tin tempo pa ningun actividad, pues lo dispidi di nan y pa nan sigui pa Corsou.
Concluyendo, Premier Wever – Croes den nomber di Gobierno di Aruba ta invita henter comunidad pa sali y mustra Rey Willem Alexander, Reina Maxima, y Prinses Amalia un caluroso bon bini y ohala nan tur keda encanta cu Aruba.