Secretario General di MEP ta remarca e logro grandi recien na Sint Maarten, unda Lider di MEP y Prome Minister di Aruba Evelyn Wever – Croes a logra bari un ley di reino (rijkswet) “COHO” for di mesa net dilanti e siman grandi cu Aruba ta celebra Dia di Betico, esta dia 25 di januari proximo.
Pakico esaki ta importante:
Betico Croes e luchado incansabel y realisador di Aruba su Status Aparte, a bringa 15 aña largo pa por a convence Hulanda pa saca Aruba pafo di e constelacion Antiyano. Desde 12 di maart di aña 1983, durante e Conferencia di Mesa Rondo (Ronde Tafel Conferentie) e tempo aya Prome Minister di Hulanda Ruud Lubbers a declara e famoso palabranan:” De kogel is door de kerk.” Durante e conferencia aki tambe a pone e fecha di 1 di januari di aña 1986 cu Status Aparte lo drenta na vigor. Asina a duna Aruba 3 aña pa prepara tur cos. E Lider incansabel Betico Croes na su regreso despues di e Conferencia di Mesa Rondo a declara na aeropuerto di Aruba den un speech historico: “ Locual nos a logra awe ta un clompi di diamanta. Hunto boso ban conserv’e. Dia cu locual nos a logra awe, esta nos Status Aparte wordo menasa atrobe esaki ta significa guerra.”, palabranan veredigno aki di Betico a keda biba den nos y su mensahe pa conserva e lucha y e Status Aparte. Betico e tempo aya a premira y a spierta pueblo pa cualkier acto di Hulanda, su vision tabata inmenso y kisas awe mas di 30 aña despues nos ta compronde precies kico e tabata visualisa y kier a bisa nos. Berdad momento Covid 19 a bati na nos porta (maart 2020) esaki a laga henter e pueblo den un situacion debil financieramente y ta hustamente e momento ey, Hulanda a scoge pa menasa parti di nos Status Aparte a cambio di ayudo financiero. Pero awe nos mester ta hopi orguyoso cu nos Prome Minister Evelyn Wever – Croes, kende strategicamente a guia henter e proceso y team pa keda na mesa cu Hulanda, pero cu postura fuerte. Splicando Hulanda cada bes cu COHO no ta sirbi interes di un pueblo autonomo na e manera cu Hulanda kier a impone riba e islanan. Esaki tabata manera un “gedwongen huwelijk” locual Hulanda kier a haci. Esaki tabata agenda di Hulanda (BZK) pusha pa militar Knops desde inicio. Cu hopi inteligencia a keda na mesa pa convence Hulanda cu strangulando un pueblo solamente paso bo ta prestando Aruba placa no ta manera pa deal cu otro den 2020 bin ariba. A tuma tempo pero cu respet pa otro a logra pa Hulanda acepta mira otro opcion cu Statuut ta brinda.
Aruba su proposicion a wordo acepta:
Despues di casi 2 aña di debatenan intensivo ariba un (CHE cu a bira COHO na caminda), cual ta un invento di Ministerie van Binnenlandse Zaken en Koninkrijksrelaties (BZK) y pusha pa militar Knops nos a logra convence Hulanda lo contrario. Na juni di aña 2022 tanto Sint Maarten, Curaçao y Aruba por a propone un alternativa of otro tipo di areglo conoci como “onderling regeling” di acuerdo cu Statuut artikel 38 lid 1. Esaki sigur ta algo mucho mas husto cu ta ancra den Statuut. E proposicion di Aruba cu a wordo entrega na juni 2022 finalmente ta modelo cu a wordo aproba recientemente na Sint Maarten. Asina por a pone un punto final tras di e discusion cu a costa hopi energia y tempo pa por a bari e “rijkswet” COHO for di mesa.
Aruba por ta orguyoso y por celebra Dia di Betico trankil:
Awe Aruba por ta orguyoso cu nos Prome Minister Evelyn Croes y Lider di MEP sosteni pa su profesionalnan a uza tanto experencia cu nos a logra di Betico Croes durante e lucha pa Status Aparte den combinacion cu strategianan bon scogi pa convence Hulanda pa frena y stop e idea di COHO y haci uzo di locual Statuut (desde logro di Status Aparte di Betico) ta permiti pa yega na un areglo husto pa pueblo di Aruba, Curaçao y Sint Maarten. Aruba por ta orguyoso awe di su Prome Minister Evelyn Wever – Croes cu e logro grandi aki den porta di celebracion di Dia di Betico 25 di januari e siman aki. No a scoge pa bay den welga di hamber y sapatia bou di palo tirando palabra pa henter mundo. A scoge pa keda na mesa pa con zuur e por tabata, pero pa para cu postura fuerte y negosha. Den nomber di henter pueblo di Aruba y sigur sostenedonan di Movimiento Electoral di Pueblo (MEP), masha masha danki Evelyn y ekipo.
