Den Lucas 6:46 ta para scirbi: Y pakico boso ta yama Mi Señor, Señor, y no ta haci loke mi ta bisa?
A bira manera un wega, priminti den nomber di Señor y no cumpli.
Otro cos cu a bira custumber huramenta den nomber di Señor y despues no por para pa e palabra di Señor.
E ta algo cu a bini ta sosode rond mundo, pero no ta pasobra rond mundo algo ta sosode, serca nos tambe e tin di bira un custumber.
Pasobra malesa, maldad, violencia y desaster natural cu otro pais ta ricibi, nos no ta desea pa e sosode aki banda.
Ta tempo pa nos bira serio cu Dios, cuminsado for di nos matrimonio y famia, pasobra Dios ta mira tur cos y caminda Dios mira cu tin seriedad e ta duna crecemento y bendicion.
Durante un enlace matrimonial e palabra cu ta zona mas duro ta SI, esey ta pa tur hende sa cu nos ta pertenece na otro, cu nos lo permanece fiel na otro , te dia cu Dios separa nos.
Pero hopi biaha ora prueba nan bini y e enemigo ataka, nos ta lubida promesa y nos ta kibra e bida matrimonial. Sin corda cu nos por bay bek serca Dios cu nos a cuminsa cune.
Ora un persona huramenta den nomber di Dios, pa e haci e trabao cu e mester haci, e mester sa cu si tin algo cu ta bay contra di e palabra di Dios presenta, e mester tuma e decision cu ta partidario di Dios.
E no por tuma otro decision, pasobra e a huramenta di haci su trabao manera Dios ta manda.
Un soldaat ta huramenta pa defende su pais, cu su bida, e no por hala atras, sino e ta wordo considera traidor of desertor.
Den Lucas 9: 62 ta para scirbi: Ma Hesus a bise: Ningun hende cu pone su man na ploeg y ta wak patras no ta apto pa e reino di Dios.
Den tur area di nos bida, ora nos tuma Dios na serio, nos ta bay dilanti, pasobra Dios mes lo habri porta pa nos. Tin hopi no kier kere ainda di e gran balor di respet y obedencia na Dios.
Den Genesis capitulo 26 Señor a bisa Isaac, Lo mi bendiciona bo, pasobra bo tata Abraham a obedese mi.
Nos comunicacion cu Dios no ta sinta den nos estudio di universidad , pero den nos respet y obedencia na Dios.
Nos por yama riba nomber di Hesus henter dia, pero si nos no ta haci locual cu E kier , nada lo no cambia.
Si no tin cambio di mentalidad, si e curason no ta cu Dios, tur cos lo keda simplemente teoria, nos lo keda papia y priminti, sin duna fruta.
Esun cu bisa: Mi conoce, y no ta warda Su mandamentonan ta un gañado. ( 1Juan 2:4).
Nos integridad ta depende di e balor di e nomber di Dios den nos curason y den nos bida, si tin un respet berdadero pa Dios, of ta djis un tradicion of un rutina sin base, pasobra tur hende mester reconoce cu sin Dios, nos no por logra nada.
Ta cuanto cos mas mester sosode pa hende respeta y balora e relacion cu Dios riba tur cos.
Cada biaha cu nos usa Su nomber E ta respalda nos trabao, pero si nos ta usa Su nomber y nos bida no tin e respet necesario, cu E ta exigi di nos , tur hende lo nota cu nos ta sirbi Dios di boca pafo, pero nos curason ta lew for di Dios.