Door di keda dialoga y busca solucion
A decreta aña 2023 como aña di union y positivismo. Esaki tambe ta loke cu nos tur por a experencia diabierna ultimo. Diabierna a tuma luga na Sint Maarten e reunion di Reino. A yega na un acuerdo pa baha e Ley di Reino COHO for di mesa y a logra pa bini cu un Onderlinge Regeling. E areglo aki ta respeta e posicion autonomo di nos pais, den cual nos mes lo determina kico ta miho pa futuro di nos pais. Esaki ta un topico cu parlamento di principio a indica cu esaki no ta e caminda cu nos kier. Nos no kier e ley di consensus paso no tin consensus. For di inicio nos tawata di opinion cu tin mas manera pa regla esaki.
Como parlamentario, nos a manda un verslag pa Gobierno na Hulanda pa vocifera e echo cu nos no ta di acuerdo cu COHO y RAFT, y asina tambe a stipula un postura fuerte exigiendo contestacion for di Hulanda riba con (cua argumentacion a uza) nan a yega na e decision pa exigi COHO y Raft pa pais Aruba. Lastimamente te cu awe nos no a haya ningun contesta for di Gobierno di Hulanda riba nos preguntanan y awor a yega na e punto unda cu nan mes a scoge pa negosha di nobo y asina logra un onderlinge regeling.
Nos ta contento cu a logra pa baha Ley di Reino y e organo COHO for di mesa. Esaki ta un muestra di union entre e paisnan, pero tambe siguramente Parlamento di Aruba y Gobierno di Aruba a uni den e proceso, y a asumi nos responsabilidad. Awe por mira e resultado aki cu ta beneficia henter e pueblo di Aruba. Nos autonomia ta algo di hopi balor pa nos tur y principalmente nos generacion cu ta bini.
Mi kier gradici minister presidente Sra. Mr. Evelyn Wever-Croes pa su tremendo trabou cu el a eherce den e proceso aki door di keda dialoga, busca como presenta solucion, y e solucion a keda aproba. Mi kier gradici tambe, Fraccion di MEP y specialmente nos lider di Fraccion Sra. drs. Shailiny Tromp-Lee pa su tremendo trabou eherci den ful e proceso aki.
