Proyekto di lei LOK spliká detayadamente den SER
Minister di Finansa sr. mr. drs. Javier Silvania, dia 20 di yanüari 2023, riba invitashon di Konseho Sosial Ekonómiko (SER) a duna un splikashon ekstenso riba e proyekto di lei ku a ser someté na SER pa konseho dia 15 di desèmber 2022, e asina yamá ontwerplandsverordening op de kansspelen, mihó konosí komo LOK. E proyekto di lei aki tin komo ophetivo prinsipal modernisá e organisashon i regulashon di tur wega di azar na Kòrsou konforme normanan internashonal i asigná un órgano eksperto independiente ku aplikashon di e normanan aki ku ta regulá e tipo di weganan aki i a la bes kombatí i prevení adikshon na wega di plaka.
E proyekto di lei LOK ta duna un kuadro general pa regulá tur wega di azar ku ta ser ofresé na òf for di Kòrsou. Parti integral di LOK ta establesimentu di un outoridat, asina yamá Curaçao Gaming Authority (CGA), pa apliká e regulashonnan den pais.
Minister Silvania a suprayá na SER e importansia di modernisá supervishon di e sektor di weganan di azar.
Dia 28 de mei 2021, SER a saka un konseho ekstenso riba un vershon anterior di LOK.