Durante evento pa prensa, A.T.A. a comparti cu aña 2022 tabata un aña fuerte y positivo den recuperacion di turismo. Conforme resultado di organisacion International di Turismo (UNWTO) di e prome 3 kwartaalnan di 2022, mester subraya cu Caribe a recupera mas lihe cu e recuperacion global di turismo y tambe mas lihe den region di ‘Americas’.
Si wak den Caribe, Aruba como parti di e destinacionnan top di Caribe, su recuperacion tabata mas fuerte compara cu mayoria di e otro destino nan den Caribe. Esun di mas fuerte tabata Republica Dominicana.
Algun factor instrumental cu a pusha e recuperacion mas rapido aki, compara cu otronan, ta e strategia di e ekipo di maneho di crisis cu a duna hopi bon resultado y e hecho cu A.T.A. por a sigui move na un manera agil y mas rapido entre otro pasobra nos ta conta cu un fondo di emergencia cu por a usa durante di e pandemia.
E fondo aki ta un parti instrumental di Aruba su modelo di maneha turismo, den e caso aki pa medio di Aruba Tourism Authority.
Un otro factor cu ta bon pa remarca ta e importancia di e industria di “time share” tambe cu sigur durante tur momento di crisis ta brinda un fluho di bishitante cu ta bolbe pa haci uso di nan propiedad “time share”.
E maneho di Aruba & di A.T.A. ta uno pa cual a gana e premio di e “Caribbean Destination Resilience Award” Oktober 3, 2022. Aki a reconoce e destinacion cu a sobresali pa su “outstanding leadership, innovation and collaboration” cual a catalisa e recuperacion durante e pandemia.
