Prome Minister Evelyn Wever-Croes:
‘Danki pa stima nos pais’ ta e tema di e aña aki
Muchanan di Prinses Amalia Basisschool tawata entusiama wardando riba bishita di Prome Minister Evelyn Wever-Croes na nan scol. Manera e añanan anterior durante e siman di celebracion di Dia di Betico, Prome Minister lo ta bishitando diferente scol na Aruba pa mira con scolnan ta preparando pa e dia aki. Diaranson 18 di januari mainta, Prome Minister a bishita Prinses Amalia Basisschool pa asina e mes por conta e muchanan e historia, bida y logro di e gran luchador di nos Status Aparte, Gilberto François ‘Betico Croes’.
E tema cu a wordo trata e aña aki pa Gobierno di Aruba ta ‘Danki pa stima nos pais’. Ta e stimacion aki di Betico pa nos pais, den union cu pueblo di Aruba y e curason di positivismo di cada ciudadano, tawata e motor pa Aruba logra Status Aparte na e momento apropia.
Prome Minister a comparti hopi informacion tocante di e historia di bida y trabou di e gran Lider y Libertador Betico Croes cu alumnonan di klasnan 5 di e scol. Muchanan a ricibi un flyer cu preguntanan tocante Betico cu tawata un manera pa habri topiconan interesante tocante e gran Arubiano Betico Croes.
E klasnan tawata hopi bon prepara y e muchanan a demostra cu ya caba nan tin hopi conocemento di e storia di Betico Croes. “Esaki ta algo cu ta yena mi cu hopi orguyo y placer di sa cu nos muchanan sa ken ta Betico. Esaki ta e responsabilidad di mas grandi di nos generacion pa traspasa na nos muchanan ken ta Betico, kico Betico a haci pa nos, su lucha, bida y pricipalmente su sacrificio cu awe nos ta biba den un pais liber. Ta importante cu nos muchanan por sigui carga no solamente e celebracion di Dia di Betico, pero tambe e idiologia y cu tur wordo inspira, pa den union y positivismo, nan tambe logra cosnan grandi pa Aruba”, Prome Minister a expresa.
Prome Minister ta gradici Prinses Amalia Basisschool, Cabesante Juffrouw Roelin Hofman, Juffrouwnan Gina y Rexy di klasnan 5a y 5b, demas docente pa e ricibimento cordial y ameno na e scol.
