E seri di evento di e siman di deporte ta tuma lugá for di 24 di mart te 2 di aprel 2023.
INDEBON (OLB) den koperashon ku Fundashon Wega Di Number Bonaire (FWNB) i Tourism Corporation Bonaire (TCB) ta presentá un evento nobo i fasinante pa e industria di deporte, wellness, salú i bienestar di Boneiru.
E tema di e siman ku ta It’s in our nature ta eksponé e komunidat deportivo di Boneiru na momentu di posishonamentu di nos isla komo un destinashon di deporte pa tantu habitantenan lokal komo bishitantenan for di henter mundu. E punto kulminante di e Siman Internashonal di Deporte Boneiru históriko akí ta e promé partido di futbòl di kampionato internashonal di Concacaf dia 28 di mart 2023 na Boneiru, kaminda selekshon di futbòl di Boneiru lo hunga su promé wega internashonal di Concacaf kontra selekshon di Turks & Caicos den stadion di Rincon.
E programa di e Siman Internashonal di Deporte Boneiru lo forma e esenario pa un variedat di evento deportivo na nos isla, entre otro e ‘Girls Fast Pitch softball bash’ ku lo tuma lugá for di 23 di mart te ku 26 di mart 2023. Lo duna diferente klínika di sòftbòl pa mucha ku hungadónan for di Aruba, Kòrsou i Hulanda. Dia 26 di mart 2023 nan ta organisá un ‘Walk for all’, esta un kaminata pa tur hende den nos komunidat komo parti di e siman di deporte, siguí pa un kompetensia di kareda na pia i un evento prèt riba baiskel.
E evento internashonal Aqua Speed Pro Kids ta tuma lugá for di 30 di mart te ku 2 di aprel 2023 ku introdukshon di un sistema mundial nobo di puntuashon pa kualifiká a base di reglamentonan internashonal di kompetensia.
E popular Bolas Krioyo tambe ta forma parti di e siman di deporte ku un Kompetensia Internashonal di Bolas ku vários tim for di e islanan ABC ku ta kompetí kontra di otro for di 30 di mart te ku 2 di april 2023 ora e weganan final tuma lugá.
For di 30 di mart te ku 2 di aprel 2023 un evento internashonal di Beach Tennis tambe ta tuma lugá. Ta organisá e evento di beach tennis na Boneiru pa hungadónan ‘single’ i duo ku partisipantenan for di nos islanan besiña i Hulanda.
Durante e siman di evento i aktividat di deporte e partnernan ta organisá diferente otro evento kultural i musikal, manera e Kralendijk Shopping Night dia 25 di mart 2023 i un Taste of Bonaire edishon Deporte i Kultura dia 1 di aprel 2023.
E Siman Internashon di Deporte Boneiru lo ta un atrakshon pa tantu bishitantenan komo habitantenan lokal pa djòin i kompartí nos espíritu deportivo bou di e título “It’s in our nature’. Pa mas aktualisashon i informashon, bai riba www.bonaireisland.com.
