Sion Janga, miembro fundadó i prospekto kandidato riba lista di M21:
Biahamentu ta hopi importante pa nos na Boneiru. Nos ta mira kuantu hende ta biaha bin Boneiru òf ta biaha bai un di nos islanan pa bishitá famia. Pero tambe nos ta mira kon preis di pasashi ta demasiado haltu, loke ta pone bo pensa dos, tres biaha si ta realmente nesesario pa biaha si òf nò. Un biahe di Boneiru pa Kòrsou ku ta dura 20 minüt ta kosta $200 i pa bai Aruba $360. Un studiante boneriano na Hulanda ku kier bin Boneiru tin ku paga entre $1000 i $3000. E motibu di e preisnan akí ta ku e rutanan ta muchu “fini”, esta rutanan kaminda tin un òf dos aerolínea so ta bula sin ningun kompetensia. Pero ta yega un momentu kaminda biahamentu ta bira solamente algu di luho i esei nos tin ku evitá. Kòrda ku na Boneiru, nos no ta biaha solamente pa nos plaser. Tin ora nos ta biaha pa motibu médiko, pa bishitá famia, pa bishita di trabou i tambe pa sigui un estudio.
Algun aña pasá, gobièrnu di Hulanda a laga hasi un investigashon pa wak kon por baha preis di pasashi na Boneiru. Konklushon di e rapòrt akí tabata ku òf Hulanda mester bai supsidiá preis di pasashi òf mester bai sinta ku tur aerolínea na mesa i pone kondishon skèrpi. Pensa por ehèmpel riba un akuerdo kaminda gobièrnu ta bisa un aerolínea ku su preisnan no por surpasá un montante ku gobièrnu stipulá òf un akuerdo kaminda gobièrnu ta stipulá kuantu stul un avion mester tin disponibel i kuantu biaha e por bula ida i buèlta. Esaki ta algu ku Fransia ta hasi na e islanan den Karibe ku ta kai bou di dje.
Un otro instrumento ku paisnan den Oropa ta usa pa hasi pasashi mas barata ta introdukshon di deskuento riba preis di pasashi. Na Noruega por ehèmpel gobièrnu a bin ku un akuerdo kaminda ku e aerolínea mester bula entre Oslo i Forde (ku tin e mesun distansia mas òf ménos ku St Maarten pa Boneiru) ku 112.000 stul disponibel pa aña, e mester bula 3x pa dia, su preis di pasashi no mag surpasá $272 i e mester duna un deskuento di 50% na hende riba 67 aña, studiante, hende siegu i hende ku otro limitashon.
E kos di mas tristu ta ku ta for di aña 2018 gobièrnu di Hulanda tin e rapòrt akí, pero nan no kier implementá e konsehonan ku nan a haña pa asina nos na Boneiru por biaha barata. Awor akí minister di Infrastruktura i Maneho di Awa ku ta responsabel pa aviashon a bisa ku na fin di aña 2023 e ta bai atendé ku e tópiko akí. Gobièrnu di Boneiru tambe tin un ròl den e asuntu aki. Gobièrnu a introdusí e impuesto di turista di $ 75. Pa luna gobièrnu ta risibí mas òf ménos $ 900.000. E sèn akí gobièrnu por usa pa introdusí deskuento pa nos studiantenan boneriano ku ke bin Boneiru for di Hulanda por ehèmpel. Pero gobièrnu por paga tambe un porsentahe di e preis di pasashi di EZAir i Divi Divi pa bonerianonan ku tin un sédula. Esaki ta algu ku gobièrnu di Boneiru mes por hasi miéntras ta warda riba gobièrnu di Hulanda.
