Djabièrnè anochi último temporada di karnaval 2023 na Boneiru a ranka sali. Esaki a bai kompañá ku vários diskurso i aktuashon ‘live’ di entre otro Payola, JC & Friends i DJ Ash. Tema di e aña akí ta ‘Ban gosé i engrandese nos mes ku nos mes’. Karnaval 2023 ta dediká na Elvis Janga i Festival di Tumba ta dediká na Almar Nicolaas.
Diputado di Kultura Elvis Tjin Asjoe tabata presente na nòmber di gobièrnu di Boneiru. Den su diskurso el a bisa e presentenan: ‘Mirando e pandemia di corona i e reglanan ku tabata vigente relashoná ku esaki, durante e dos añanan tras di lomba no tabata posibel pa selebrá karnaval na Boneiru. P’esei, laga nos hasié un fiesta grandi i laga nos tur gosa di dje.’ E diputado a hasi uso di e oportunidat tambe pa hala atenshon di pueblo pa anda na un manera sabí ku uso di alkohòl i pa ta kouteloso den tráfiko durante e temporada di fiesta.
