Durante di un anochi pa sera e aña 2022, Partido AVP a tene un actividad special den cua a haci entrega di e “PREMIO BON COMUN”. Cu e principionan Christian Democrata di partido AVP den mente y e metanan di “BON COMUN” su dilanti, partido AVP a introduci e premio BON COMUN pa duna reconocemento na hende y organisacionnan cu den nan trabou diario of den nan iniciativanan pa nos comunidad, ta biba e idealnan di sirbi interes general, sin interes of beneficio propio. Nos comunidad chikito tin hopi hende cu den nan trabou, den nan tempo liber, den nan hobby y den actividadnan riba propio iniciativa, ta haci un sin fin di cos pa otronan den comunidad, sin cu nan ta spera di haya algo bek. Nan ta haci e cosnan aki cu amor, cu dedicacion y cu un motivacion simpel di haci bon pa otro y contribui na un miho bida y un miho comunidad. Partido AVP kier stimula e actitud di sirbishi voluntario aki. Cu e premio di reconocemento di “BON COMUN” kier gradici e hendenan y organisacionnan pa loke nan a y ta haci y stimula nan ta sigui cu nan bon trabou.
PROME RECIPIENTENAN
E prome recipientenan di e premio “Bon Comun” ta bin di tur skina di nos pais y di practicamente tur sector di bida. Nan ta ehempelnan di ciudadanonan cu di nan propio boluntad ta traha pa interes general.
Monique Trappenberg ta cabesante di scol basico Rosario College. Ela ricibi e premio di reconocemento pa su bon trabou como maestro, den scol y pafor di scol. Monique a accepta e premio pa tur e maestronan di su scol, cu hunto ta haci e experiencia di enseñansa pa tur nan alumnonan uno special.
Irene Dake ta un conocido lider deportivo specialmente activo den futbol infantil. E ta hopi activo tambe den Club RCA. Den bida diario Irene Dake ta yuda hende spontaneamente den tur forma cu por. Irene a ricibi e Premio Bon Comun pa tur esaki y en especial pa su dedicacion incansabel pa e muchanan.
Erick Gomez ta simbolo di voluntarismo na Aruba. E a ricibi e premio pasobra den tur loke e ta haci como voluntario e ta personifica e nificacion di “bon comun”: duna di Bo mes sin busca of spera niun beneficio pa Bo mes.
Silo Tromp ta conoci como trainer di futbol, pero e ta haci hopi mas cu djis train y organisa su club Nacional. Silo a haya e reconocemento di Premio Bon Comun pa tur e añanan cu den forma ehemplar, continuo y cu amor ta dedica na guia hobennan den deporte y den nan bida.
Zelda Steenen, un jeffrouw di scol di enseñansa special ta bon conoci pa e forma cu e ta traha incansabel y cu un sentido di responsabilidad grandi pa tur su muchanan. Pa su servicio na nos comunidad sin niun interes propio ela ricibi e reconocemento di ta un bon ehempel di valor di “bon comun”
Deaxo Croes a bira e simbolo di disciplina, persistencia y dedicacion continuo pa henter un generacion di hobennan cu ta busca direccion y stabilidad den un mundo cada dia mas complica. Pa su contribucion incalculabel pa inspira hobennan y su contribucion na otronan den nos comunidad cu su landamento di distancianan largo, Deaxo a ricibi e reconocemento cu e premio “bon comun”.
Anouk Balentina, un señora profesional hoben y persistente, a lanta para apesar di tur contratiempo y resistencia, pa lucha pa un medio ambiente mas limpi y sostenibel. E tin hopi aña ta lucha pa un forma mas limpi y responsabel di deshaci di desperdicicio na Aruba, en especial na e dump na Parkietenbos. Pa su curashi y persistencia na interes di nos comunidad, Anouk a ricibi e premio “bon comun”.
Fundacion pa nos Comunidad
E iniciativa pa yuda otronan y e sentido di responsabilidad pa tur hende den nos comunidad ta wordo ilustra perfectamente den e trabou di e FUNDACION PA NOS COMUNIDAD. Pa hopi aña, e organisacion aki ta yuda miles di individuo y famianan cu ta cay den pobresa y no por cubri e necesidadnan mas basico riba nan mes. Pa e bunita trabou na servicio di nos comunidad, FPNC a ricibi e reconocemento aki di premio “bon comun”.
Jean-Miguel Loepstok y Jeanuar Loepstok ta dos ruman hoben cu na e edad hoben ya ta demostra un disponibilidad espontaneo pa yuda otro hende y sirbi esnan rond di nan sin spera nada pa nan mes. Cu esaki nan ta yena nos cu speransa cu e balor di sirbi sin interes propio lo sigui biba y crece den nos comunidad. Pa esaki nan na ricibi e premio “bon comun” 2022.
Adonsito Croes
Incansabelmente y cu un alegria contagioso Adonsito Croes ta dedica su tempo na desaroyo y diverticion di mucha y hobennan den nos comunidad, sin spera niun elogio of beneficio pa esaki. Tanto den scol como maestro, como pafor di scol, e ta sirbi nos comunidad den e forma ehemplar aki. Pa esaki e a ricibi e reconocemento di e premio “bon comun”.
Jareth y Tristan Vermeulen
Dos ruman deportista cu ta destaca den nan ramo di deporte, pero tambe pa nan trabou voluntario cu hobennan, ta demostra e balornan di sirbi como bon ehempel y di sirbi otro sin interes propio. Pa esaki Jareth y Tristan a ricibi e premio “bon comun”.
Giovanni Villamizar
Hunto cu otro hobennan e a scohe pa bira polis y sirbi nos comunidad den su trabou y pafor den comunidad. E sirbishi aki di traha sin busca beneficio of reconocemento propio ta e motibo pakico Gionanni a ricibi e premio “bon comun”.
Melvin Dabian
Como organisador y guia pa hoben y adulto den deporte y ehercicio Melvin Dabian ta wordo mira como un ehempel pa guia y yuda otronan den su tempo liber, sin busca niun interes propio. Pa esaki Melvin Dabian a ricibi e premio premio “bon comun” cu gradicimento y estimulo pa e sigui cu e bon trabou aki.
Karyme Acosta
Hoben, deportista y activo den yuda spontaneamente den comunidad ta loke ta caracterisa Karyme awor caba. E ta un deportista prometedor, pero mas aun e ta promete di ta un ciudadano cu semper ta cla pa yuda otronan sin busca of spera nada pa su mes. Pa e actitud aki cu ta ilustra e espirito di sirbishi, e ta ricibi e premio “bon comun”.
Saraquita Offringa
Su triumfonan di mas cu 20 aña a inspira hende y hobennan rond di mundo. Su actividadnan voluntario cu hobennan ta motiva nos cu hendenan asina exitoso ta dedica nan tempo liber pa yuda comunidad den formanan bunita sin busca beneficio of interes propio. Pa esaki Saraquita a ricibi e premio “bon comun”.
Kamilah Dammers
Kamilah a logra exitonan grandi den ultimo añanan den su ramo di deporte di “bowling”. Cu esaki e a motiva otronan pa haci deporte. Su iniciativanan pa dedica tempo di su mes pa guia otro hobennan sin interes propio ta e motibo pakico a reconoce e dedicacion di Kamilah cu e premio “bon comun”.
Jourraine Halabi
Como enfermera e ta traha incansabel y cu profesionalismo y dedicacion pa sirbi enfermonan na Aruba. Pa su coleganan y pa enfermonan e ta e ehempel di sirbi otronan cu amor, sin importa ta ken of den cua situacion. E sirbishi na otronan den forma excepcional aki ta e motibo pakico Jourraine a ricibi e premio “bon comun”.
Terrence Ras
E ta maneha un negoshi chikito cu tin cu lucha pa tene cabez riba awa den tempo dificil. Apesar di esey e a dedica tempo y recursonan di su negoshi pa crea facilidadnan cu ta yuda otro hende biba miho. E ta haci esaki sin busca beneficio propio of reconocemento. A reconoce e bon trabou di Terrence Ras y su compania na sirbishi di nos comunidad cu e premio “bon comun”.
Jeannine Rodriguez
E ta haci su trabou diario den un forma ehemplar, semper cu entusiasmo y dedicacion continuo. Cu esey e ta demostra cu por sirbi nos comunidad sin interes propio y cu entusiasmo den nos trabou mes. Pa su dedicacion y gana di sirbi otronan sin busca beneficio propio a reconoce Jeannine cu e premio “bon comun”.
Brian Dorothal
Pa un hoben cu tin hopi posibilidad su dilanti scohe pa sirbi su comunidad den e ramo dificil di husticia ta remarcabel. Brian a haci esaki ora ela scohe pa bira polis. E ya a demostra un gana di sirbi su comunidad sin busca elogio of beneficio propio. Den su trabou e kier sigui demostra esaki. Ta pesey a reconoce y stimula e gana di sirbi si interes propio cu e premio “bon comun”.
Annelien Tromp-Diaz
Persistencia y dedicacion ta loke Annelien Tromp-Diaz a y ta sigui demostra cu mas di 40 aña di guia y educacion di mucha muhernan hoben den “padvinderij”. Tur siman pa tur e añanan aki caba e ta dedica su tempo liber pa guia y educa mas cu 150 mucha muhernan den diferente districto di Aruba. Pa e dedicacion y sirbishi voluntario aki e a wordo reconoci y gradici cu e premio “bon comun”.
Icho Matos
Conoci como masahista, Icho ta yuda otronan den tur forma cu e por. Ehemplar den su trabou y dedica den sirbi otronan sin busca niun beneficio propio, ta loke ta haci cu Icho ta un di e prome recipientenan di e premio “bon comun” 2022.
