Vicente M. Wouters, kende ta miho conoci como ‘Buchi’ Wouters kende a nace na Aruba, riba 19 di juli 1943 y a bay laga nos riba dia 29 december 2022. Su señora Lina Donner, su yiu Melissa Wouters, su mayornan Thomas Wouters y Thomasita Wouters-Ras, ambos di feliz memoria y su rumannan Regina, Joseph, Flora,Rita,Jola, Lena, Lima,Elvia y Harold.
Buchi Wouters tabata un persona multifacetico kende a ocupa diferente funcion y rolnan na bida. E tabata un empelado publico, empresario, manager di banda, y un Scout di Talento, kende a descubri y forma un gran cantidad di artista, musico y agrupacionnan musical Arubano, manera: – The Key; – Edwin Abath & his group; – La Reencarnacion & Heavenly Bodies; – Musical Time (hunto cu Elgin Juddan d.f.m.).
Buchi a lanta y studia na Aruba. Na 1959 el’a termina su 10de klas di MULO na Sint Augustinus College. Asina cu el’a caba scol e tabata compaña su omo Jose Wouters bay trabou na Sociale Zaken. Cu su 16 aña ya caba e tabata yuda na Sociale Zaken como loopjongen. Despues di un tempo el’a cuminsa traha cu Gobierno na e Departamento di Asuntonan Social mes, como Bode. E tabata un persona semper serio den loke.e ta haci. Mas laat den su carera el’a studia Ley (Rechten) hunto cu su bon amigo sr. Arie Swaen. Aunke e no a termina e estudio di Ley, semper e tabata yuda hende y amigonan cu consehonan huridico. Na Departamento di Asuntonan Social e tabata asisti hopi cliente den casonan pro-deo, como abogado liber, por ehempel den casonan di divorcio, alimentacion, etc. Na e departamento aki Buchi a keda traha cumpliendo 44 aña di servicio den Gobierno pa despues a baha cu pensioen. Hopi ta esnan cu ta bisa cu Buchi ta un gran persona y bon amigo. E tabata hopi estricto den locual e kier of ta kere aden, pero semper cu un bon meta. E tabata un persona cu ta gusta ambiente. Cas di su mayornan, Thomas y Thomasita tabata cas di tur e musiconan cu a pertenece na su agrupacionnan musical. Buchi tabata un persona masha precies y organisa. E tabata un mentor pa hopi, asina el’a sa di guia hopi musiconan, kendenan awendia a bira musiconan grandi y respeta. E tabatin un Don particular y semper tabata scout e talentonan hoben musicalmente. Un cos ta sigur cu el’a sa di stimula hopi di nan pa studia pa un miho mañan y tambe stima musica. Buchi tabata exigente, pasobra p’e calidad di musica y bon presentacion ta importante. Buchi no tabata exigi, pero si stimula e musiconan pa lesa partituranan musical (lesa musica) y tabata strak y precies cu e ensayonan. Ta p’esey su gruponan semper tabata di bon calidad. Buchi, aunke el’a lanta den e districto di San Nicolaas, no tabata diferencia entre p’ariba y p’abou di brug. P’e como scout artistico y productor, integracion di tur musiconan ta conduci na excelencia. E tabata percura pa stimula su musiconan riba nan formacion musical. Como un bon lider y dirigente e tabata un homber cu tabata gusta pa ta bon pega, bisti bon y elegante. E tabata ‘soft spoken’, cu den poco palabra ya bo por sa kico e kiermen of desea. E mes tabata stima musica masha tanto mes. Bushi semper tabata kere den e spirito di ekipo entre su musiconan y esey ta semper su meta y proposito cu su bandanan.
E musiconan semper tabata sinti nan mes na cas, na cas di su mayornan. Buchi tabata percura pa e conexion personal cu su musiconan. Nan tabata sinti nan mes mas como amigo cu di ta colega musico. P’esey varios ta corda con nan tabata bay riba diadomingonan di Playa of unda cu ta pa Weg Rooi Hundo na San Nicolaas djis pa combersa y hera nan ta jam riba un piesa tambe y pasa bon.
Algo importante pa resalta cu varios ta e musiconan cu a expresa cu musica tabata importante pa Buchi, pero sin nunca busca propio merito of reconocemento. Banda di musica Buchi tabata gusta su futbol tambe y tabata hunga pa San Nicolaas Juniors. Banda di esaki tabata organisa torneo tambe di softball entre e musiconan na San Nicolaas Juniors. Encuentro deportivo tabata pa fomenta un ambiente sano y familiar den e bario di Weg Rooi Hundo. E veld banda di su cas.
E tabata semper t’ey tambe como un consehero huridico pa musiconan y otro hende en particular.
Durante parada di carnaval e ta manera un clabo na cas di Regina su ruman muhe riba Pastoor Hendrikstraat ta spera e parada pasa y semper cu su T-shirt di Musical Time, ‘One Family’, manera un famia, mientras e otronan tabata bisti e flanel di ‘Tide’ di Musical Time…
E tempo aya por lo menos di 1973-1990 Buchi tabata empresario y promotor di hopi eventonan cu artistanan di renombre internacional ,manera Ricardo Rey, Bobby Cruz, Rey Barreto, Tipica 73 di Puerto Riqueño- y Cubanonan, Salserio, for di Corsou Macario Prudencia, Estrellas del Caribe, Edgar Supriano ‘Boy’ Dap, Edwin Tomasa, y Doble R Super Special Stars, Conhunto San Hose, ‘Name Still in The Game’ di Corsou, Control Band di Sint Maarten y Lino & Hardaways. Algun evento tabata organisa hunto cu Jonchi Bislip.
Buchi a cuminsa su trayectoria musical como manager (doño) di su prome banda musical. Esaki tabata na aña 1968 bou di e nomber di ‘Puzzle Pates’ (RockBand) cu su integrantenan: Fai Luidens, Billy Hassell, Franklin ‘Mecha’ Sophia y Chito Romero (dfm). Despues a sigui cu e banda ‘The Key’ na 1972 hunto cu Walter de Cuba (dfm), Wiwi Peña, Ronny Colmenares, Franklin Sophia, Rafi Camacho, Efren Benita, Eddy Giel y Chito Romero.
Mas despues di e temporada di e banda ‘The Key’na 1975 a lanta ‘La Reencarnacion’ cu Efren Benita, Elgin Kock, Freddy Vorst, Guillermo ‘Shon We’ Stede, Benny Vrolijk, Herman Stephens, Baldomero Morris, Eddy Giel (dfm), Alex ‘Echie’ Odor (dfm), Lucio Rivadeneira (dfm), Edwin Abath, Walter de Cuba (dfm), Franklin Granadillo, Fon La, Kenneth Samson y Mai de Cuba.
Na 1976, ‘Heavenly Bodies’ un banda hopi gusta y pa fiestanan pa hubentud cu a dura di 1976 te cu 1978. Integrantenan tabata: Michael Vrolijk (dfm), Eddie Giel (dfm), Alex Odor (dfm), Eddie y Kenneth Samson, Freddy Franken, Elgin Kock, Doodle Sophia y Edwin Abath.
Na 1979 Buchi a sigui cu e banda ‘Je t’aime’ hunto cu Reno Steba, Francis, Gino, Leo Rodriguez, Jack Tromp, Elgin Juddan (dfm), Olivia Murray y Jane Koolman.
Buchi a keda semper bay activo y tabata na aña 1980 cu El’a sigui cu e banda di tur tempo ‘Musical Time’ hunto cu integrantenan: Elgin Juddan (dfm), Edwin Abath, Teddy Philips, Olivia Murray, Doodel Sofia, Claudius Philips, Nacio Richardson, Harry Rodriguez, Alex ‘Echie’ Odor (dfm), Chicho Kock, Hildward Croes (dfm), Herman Stephens, Tony Hoevertsz, Eddy Giel, Eddie Ras, John Ras, Humprey Hewit, Alberto ‘Brother’ Pantophlet, Elgin Kock, Boei Briezen, Roy Ellis, Inky Richardson, Johnny Milan, Randy Dirksen, Neomar Maduro, Juancho Camposino, Gerardo Janga, John Tromp, Shurby Maria, Richard ‘Tattoo’ Quant, Franklin Giel, Goyo Van der Linden, Hubert ‘Oily’ Busby, Reynaldo Suarez, Lazaro Barizonte, Stanley Lloyd, Ety Paskel, Daniel Werleman, Ramphis Tromp, Fan Ras, Juan Tromp y e actual manager Leo Rodriguez.
Soundman di Musical Time: Victor Piña, Victor Rasmijn y Allan Severina. Instrument drager: Pedro Piña y Ito Rasmijn.
Alaves Buchi tabata maneha; Apollo Bar & NightClub, Isla di Oro y Hotel Workers Union.
Buchi a mentor, guia y a inicia hopi musico y artistanan den e mundo di musica y espectaculo. Nan ta: Claudius Philips; Eddie Samson; Chicho Kock; Doodle Sophia; Victor Camacho; Teddy Philips; Richard ‘Tattoo’ Quant; Inky Richardson; ‘Long Roy’ Ellis; Alex ‘Echie’ Odor (dfm).; Harry Rodriquez (dfm).;-Elgin Juddan (dfm).; Tissy Vrolijk, Carlos ….. , Marlon Istatia y hopi mas …
Presentacion na Clubnan:
-Isla di Oro; – Commandeursbaai Club; – Rooi Lamoenchi; – Hotel Workers Union; – Esso Club;- Golf Club; – Sint Maarten Club; – Bonaire Club; – Trappers Club y – Wintergarden.
Giranan importante pa varios pais manera: Hulanda, Miami (Calle 8). Sint Maarten Carnaval, Boneiro, New York, y Curaçao.
Tur cu a conoc’e lo sigui record’e como un simpel y humilde sirbido; Un boluntario di sanger puro riba tereno social, cultural y deportivo; Un figura cu a marca historia y kende a gosa semper di gran respet den su bario di Weg Rooi Hundo, San Nicolaas y Aruba en general. Un excelente mentor y guia pa hopi hoben na San Nicolaas y otro partinan di Aruba sin distincion. Buchi cu su generosidad a contribui hopi na obranan caritativo.
E ta gusta mas cu tur cos un bon fiesta na unda mas tanto persona ta gosa di bon musica, baile, bon cuminda y bebida.
Den nomber di e musiconan, ex-colega, amistad y conocirnan ta expresa palabra di condolencia na Buchi su señora Lina, su yiu Melissa, rumannan, famia Wouters, Donner, y demas famia.
Mundo musical ta na luto. Danki na Buchi pa su contribucion na musico-, artistanan, mundo musical y comunidad di Aruba en general.
