Aruba cu expectativa a spera e mensahe di fin di aña di partido AVP. Algun ora prome cu entrada di aña 2023, Partido AVP su mesahe di fin di aña a wordo lansa. Partido AVP a considera e momento oportuno pa confirma nan compromiso pa cu e cambio cu nos comunidad ta anhela y a enfatisa cu e aña 2023 lo mester ta e aña di cambio!
Impresionante tabata e discurso di dokter specialista Dr. Selene Kock cu dirigi un mensahe cu ta resona cu un precupacion amplio den nos comunidad, cual ta e deterioro di nos cuido medico. Cuido medico a conoce un negligencia sin precendente di Gabinete Wever-Croes. E medidanan impone den cuido medico a crea un situacion caotico cu tin nos profesional nan den e mundo di cuido medico desmotiva y precupa. Dr. Selene Kock a expresa cu:
“Medidanan di Gabinete Wever-Croes a laga mucho hopi di nos hendenan vulnerabel y sin defensa contra malesa. Ora cu hende mester laga remedi prescribi atras na botica, pasobra nan no por paga pe, deliberadamente e gobierno cu a corta den cuido medico, ta hungando cu bida y salud di pueblo”
Nos cuidadano cu mester ricibi cuido medico ta sinti cada dia con nan salud ta deteriora pa motibo di e efecto nan di e medidanan impone pa Gobierno di Aruba. Dr. Selene Kock a enfatisa cu e ta precupa cu nos enfermonan ta na peliger:
“Bou di e condicionnan difici aki, coleganan docter y enfermeranan ta lucha pa keda duna e cuido cu pueblo merece. Pero e maneho di negligencia ta afecta nan motivacion tambe. Hopi di nan ta descurasha y algun ya a bandona nos isla. Listanan di espera pa specialistanan a bira hopi largo. Esaki ta causa un peliger pa nos enfermonan”
E Curason dokter ta un cu ta sirbi e bienestar di esnan cu tin dificultad cu salud, no obstante e cricumstancianan den cual nan tin cu funciona. Dr. Selene Kock a comparti cu nos comunidad cu mescos cu su colega nan e ta drumi y lanta cu salud di e comunidad di Aruba den su mente. E ta hasi hopi dolor y ta causa un precupacion continuo pa mira con Gobierno ta neglisha na un manera intentional e salud di nos hende.
Dr. Selene Kock a ofrece tambe un perspectiva cu lo por guia nos pa recobra e cuido medico di calidad cu nos cuidadanonan y profesional nan ta anhela. Dr. Selene Kock a clausura deseando Aruba un Bon aña y alabes proclamando cu “E Bon Comun mester bolbe bek den gobernacion y bira e guia pa tur desicion. Aruba, ban lucha pa e cambio aki den 2023. E momento ta awor!”
