Dia 28 di desèmber KLM a malkriá su partisipantenan di Flying Blue na e evento di Pasku den Ahoy na Rotterdam. Nan a manda invitashon pa mas ku 6000 partisipante na Flying Blue ku durante e último 36 lunanan a bula ku KLM huntu ku nan yunan. Komo gradisimentu pa e klientenan fiel, KLM kier a organisá un salimentu úniko ku famia den un ambiente di Pasku den wenter. E wéspetnan a risibí un kaluroso bon biní ku algu di kome i di bebe i e muchanan por a partisipá na diferente aktividat. Despues di esei ku henter famia nan por a gosa di e tremendo shou di Sirko di Pasku Ahoy.
Boneiru, Aruba i Kòrsou tabata presente na e evento pa hasi promoshon na e grupo di enfoke sumamente importante akí. Na e stènt yen di ambiente di Boneiru nan a parti ‘label’ pa maleta i bala pa bich. Marjolein Oleana i Sander Langeveld a representá Boneiru na e evento importante akí. Tambe tabatin un sorteo pa un premio mayó entre e presentenan, kual tabata un biahe di 6 dia pa Boneiru, inkluso un ‘tour’ riba e isla i un lùnch lokal outèntiko.
Marjolein Oleana, Business Manager na Tourism Corporation Bonaire (TCB), ta haña ku esaki ta un bunita inisiativa di KLM pa malkriá biaheronan familiar fiel. Tin un enfoke kompleto riba tempu di kalidat ku famia i riba pasa tempu ameno huntu, kaminda vakansi ta forma un parti grandi di esaki. Gustosamente nos di TCB ta kontribuí ku un granito na esaki, kaminda un di e bishitantenan lo gana un dushi biahe pa Boneiru.