E partidonan ku a registrá nan nòmber komo denominashon riba lista di kandidato pa elekshon di 2023 ta konosí. Pa medio di e komunikado pa prensa akí nos ta publiká e lista kompleto komo anekso.
Partidonan polítiko lokal ku bou di un sierto denominashon ke partisipá na elekshon di Konseho Insular, mester laga registrá nan mes bou di e denominashon akí na ofisina elektoral sentral di nos isla. E denominashon akí ta bini parti ariba di e lista di kandidato riba e papel di vota. E registrashon ta keda bálido pa e siguiente elekshonnan, te ora e partido no ta eksistí mas, òf un veredikto di wes a deklar’é komo prohibí, òf pa e último elekshon di Konseho Insular no a entregá un lista di kandidato bálido.
E posibilidat pa agrupashonnan polítiko pa entregá un petishon pa registrá un denominashon pa e próksimo elekshon di Konseho Insular a sera riba djaluna 19 di desèmber 2022. Pa e registrashon akí a manda un karta na tempu pa kada agrupashon pa entregá esaki promé ku e ‘deadline’ stipulá. Mester entregá e lista kompleto di kandidato pa tur partido promé ku 30 di yanüari 2023.
