Claridad ta crea e confiansa necesario riba cual e mundo financiero ta basa su mes
Aruba tin un relacion nobo cu Hulanda pa locual ta nos debe externo. Desde cu nos a bira Pais, Aruba a bin ta financia su necesidad financiero riba e mercado di capital internacional cerca instancianan manera fondo di pensioen y entidadnan priva. Promer cu e pandemia, Aruba tabata tin un debe chikito na Hulanda di 16,1 miyon. Durante e pandemia sinembargo a bin cambio, ya cu Hulanda a presta Aruba placa pa nos por a surpasa e daño economico y financiero cu e pandemia di COVID-19 a laga atras pa nos Pais. Na e momentonan aki e combersacionnan ta bay cuminsa entre Aruba y Hulanda pa asina por stipula e condicionnan di pago di e debenan aki bek na Hulanda.
Aruba a acumula 1500 miyon florin na debe cu Hulanda cu ta madura na oktober 2023
Den aña 2020, 2021 y 2022, Aruba a acumula un debe di 1500 miyon florin cu Hulanda. Esaki a pone cu Aruba ta conoce un relacion nobo di debe cu Hulanda. Na unda antes Aruba su debe cu Hulanda tabata menos di 1% di e total di 4300 miyon florin na debe externo di nos Pais, awor aki 25% di nos debe externo di 5800 miyon florin ta den man di Hulanda debi na COVID-19. E ultimo aki ta consisti di e debe di 916 miyon florin na sosten di likidez y contando e suma di 523 miyon florin cu Hulanda a presta Aruba pa por a refinancia e debe internacional den añanan 2020 y 2021.
Debe ta madura na oktober 2023
E fiansanan cu Aruba a ricibi di Hulanda pa surpasa e efectonan di e pandemia di COVID-19, ta den forma di ‘bulletleningen’ cu ta madura na oktober 2023. Den e situacion di emergencia cu e pandemia a hinca mundo y Aruba aden, Hulanda a fia Aruba placa bisando cu despues lo regla e condicionnan di pago. Nos ta bay drenta aña 2023 y pesey ta importante pa mas pronto cu ta posibel Aruba por haya claridad riba e condicionnan di pago pa e debenan cu ta madura. Esaki ta importante ya cu Aruba mester brinda claridad tambe na nos inversionistanan internacional cu a bin ta financia Aruba su necesidad financiero riba mercado internacional di capital.
Aruba a percura pa semper cumpli cu pago di debe
Ta bon pa informa cu Aruba semper a percura pa hiba un maneho di debe conforme e capacidad di pago di nos Pais. Durante e pandemia tambe Aruba a percura pa cumpli pa refinancia e debenan internacional y local cu a madura. Debi cu awor un cuarto parti di Aruba su debe ta den man di Hulanda, pa nos capacidad di pago bek y hunto cun’e Aruba su credibilidad financiero, ta di sumo importancia pa Hulanda brinda claridad riba kico e condicionnan di pago ta. Una bes esaki bira conoci, Aruba lo por informa e otro inversionistanan internacional debidamente. E claridad aki ta crea e confiansa necesario riba cual e mundo financiero ta basa su mes.