Durante tratamento di e ley encuanto e Plan Fiscal 2023 un biaha mas nos por tuma nota cu e lider di Fraccion real di AVP ta lanta for di soño y ta bandona su penthouse na Marisol building pa bin tene su desertacion di keho sin brinda solucion. Pa algun ora e ta reemplasa su lider suplente structural y ta presenta na pia di trabou pero sin tin e habilidad pa pone un link real cu e situacion di su pais y su hendenan.
Ta manera diripiente e ta bin realisa cu nos pais y nos hendenan ta yena di reto. Hasta ta sinti e necesidad di keda accentua e situacion di pobresa y necesidad di algun famia den nos sociedad. Un realidad no di awe, un realidad cu MEP a bin ta accentua desde 2013. Un realidad di e crisis social cu el a ocaciona, un realidad di e Megadebe cu el a crea den tempo di bonansa y cu pueblo mester cuminsa paga. Un realidad cu, aunke Mike Eman no kier mira y bisa, a keda empeora door di e pandemia.
Nos por a tuma nota di un Mike Eman cu durante e reunion tabatin e curashi di papia di salario minimo y bestaansminimum. Pasobra ta bon pa pueblo realisa cu durante e 8 añanan, 2009-2017, cu e tabata den gobierno nan a hisa e salario minimo total cu solamente Afl. 134,70. Anto esaki mientras e tabata conoce e realidad di su hende y famianan e tempo ey. Pasobra durante reunion el a hasta lesa for di un tabel di CBS di aña 2010 caminda el a purba di mustra e realidad di pobresa na Aruba awendia, sin realisa cu e tabata lesa cifranan di aña 2010. Indicando un biaha mas con e kier purba tuma pueblo haci.
Tin un diferencia grandi entre e partido AVP di Mike Eman y Partido MEP. Durante Gabinete Oduber, 2001-2009, partido MEP a aumenta e salario minimo cu Afl. 431,15 den 8 aña di tempo. Gabinete Wever-Croes 1 y 2 den 5 aña di tempo ya a aumenta e minimumloon cu Afl. 137,75. Esaki ta mas cu AVP a duna esnan mas vulnerabel den 8 aña den tempo. Ta cu ki cara Mike Eman kier bin papia awe di salario minimo. Pueblo sea critico y no laga Mike Eman tuma boso haci. Papia bunita a para bira e trade mark di Mike Eman. Pasobra nos tur sa cu loke sigur e falta ta curashi y determinacion, sin lubida e habilidad pa maneha su pueblo responsablemente.
Pa finalisa ta bon pa menciona cu Gabinete Wever-Croes un biaha mas ta bay aumenta e salario minimo entrante 1 di januari 2023. Esaki ta algo cu Fraccion di MEP ta sostene y ta haya necesario pasobra ta nos responsabilidad pa di un manera of otro yuda un di e grupo mas vulnerabel den pueblo mantene su poder di compra.