Wikènt último a tuma lugá un tayer básiko di skirbi kuenta pa un grupo di 20 persona na Captain Don’s Habitat. Riba petishon di Direktorado di Komunidat i Kuido i SKAL, Denise de Jongh-Rekwest a organisá via su editorial Request Publishing un tayer di skirbi kuenta pa e grupo di enfoke di adulto. E tayer akí tabata na enkargo di e eskritornan Olga Buckley i Desiree Correa di Aruba.
Ku e tayer básiko aki e fasilitadónan a hasi un intento pa inspirá i stimulá e partisipantenan pa haña e hèrmèntnan nesesario i a duna nan vários tep pa por skirbi un kuenta. E kursistanan a keda hopi kontentu, entusiasmá i agradesido pa e oportunidat ku a brinda nan i e esfuerso ku a hasi pa nan.
Na final tur kursista a risibí un sertifikado. Pa aña 2023 lo bai tin mas tayer pa skirbi kuenta pa hóben di 15 pa 19 aña i tambe pa lidernan di krèsh.
Request Publishing ta gradisí Direktorado di Komunidat i Kuido i tambe Skal pa e konfiansa durante aña 2022 i ta deseá pueblo di Boneiru felis dianan di fiesta i tur kos bon pa aña 2023.
