Un di e companianan cu a wordo menciona e siman aki durante tratamento di caso Avestrus den Corte ta esun di Elanath. E NV aki a wordo lanta na mei 2013 door di Pieter Franken cu e meta pa cumpra terenonan na Aruba y construi casnan riba esaki.
Na januari 2014 el a bende e compania aki na Leoncita Arends pa 50 mil florin, di cual el a haya pago di 45 mil florin. E resto e no a haya. E opcion riba e tereno cu e compania tabatin ta uno riba Sasaki, unda despues a construi e edificio di e negoshi D-shop di Diana Lerma.
Inicialmente, segun testimonio di Franken, tabata e intencion pa hunto cu un inversionista Argentino desaroya un proyecto ey riba. Pues e intencion di cuminsamento tabata pa busca un tereno y construi algo eyriba. E unico cos ta cu no a menciona ki tipo di proyecto.
Con a yega na bende e accionnan di e compania pa e cumprado nobo haya derecho riba e opcion pa no tereno. Pues, segun abogado Candwood, sin siguransa cu nan tin e tereno caba. Aki ta caminda cu e mediador Lin a aparece pa arte di magia. Ta bisa asina pasobra ningun caminda den e dossier ta para con esaki a sosode.
Lin ta bisa den su declaracion cu el a wordo envolvi laat door di Diana Lerma Rios, kende a pidie studia algun documento p’e y dun’e conseho. Pero Diana Lerma y otro testigonan ta bisa cu ta Lin ta esun cu a acerca abogado di Leoncita Arends y Diana Lerma Rios pa haya e tereno.
Tin un testigo di fam Heronimo, un agente di bienes raices, kende a declara cu e ta e persona cu a pone Lin den contacto cu Arends pasobra e ultimo aki tabata en busca di un propiedad pa un cliente. E ta bisa tambe cu despues di benta di e accionnan na Diana Lerma, el a haya un comision pa su mediacion, cu tabata consisti solamente di presenta Lin na Arends. E parti aki di e declaracionnan ta ilustra cu Lin tabata esun cu a busca Arends y no lo contrario. Prome cu esaki, e abogado a bisa, Arends no tabata conoce Lin personalmente.
Tambe e testigo a bisa cu e no tabata sa di e NV=nan di Arends. El a tende for di un ehecutivo di banco cu Arends tin opcion riba un tereno. E mesun ehecutivo cu a reuni cu Arends, Franken y inversionistanan.
Kico Lerma Rios a declara? Den su declaracion e ta bisa cu el a wordo acerca door di Lin riba Elanath. Y despues Lin a sigui hiba combersacion cu tur hende den su nomber y e mes no a papia cu Arends. E tabata en busca di un tereno pasobra e kier a construi un edificio. Ora cu a inform’e di Elanath el a tuma cu man habri e posibilidad pa cumpra e accionnan di Elanath. Pero tambe a bisa cu e tabata consciente cu e NV tin solamente un opcion y cu tabatin condicionnan cu e compania mester cumpli cu nan pa por haya e tereno erfpacht. Como empresario, el a bisa, e tabata consciente di tur e riesgonan cu e transaccion aki ta trece cu ne.
Lin, segun e diferente declaracionnan, tabata esun cu a convence Arends pa bende su accionnan den Elanath na su cliente Lerma Rios y den esaki Lin a haya un comision di 45 mil florin. Pero no ta menciona for di kende el a haya e comision aki. Pues en bes di haya inversionista, a haci un oferta cu Arends dificilmente por a nenga.
