Diamars 13 di december, Prome Minister Evelyn Wever-Croes, señor Pang di Centraal Accountants Dienst (CAD) y señor Wernet di DRH tabata den Parlamento den reunion publico pa duna informacion y presentacion riba e tema Arubahuis. Esaki, Prome Minister a remarca, ta un tema cu desde cu a cuminsa cu ne, a hala hopi atencion, hasta atencion politico, den sala di Parlamento y den varios ocasion a ricibi cartanan di Parlamento pidiendo pa mas informacion. Gobierno a indica cu ta importante pa e investigacion wordo haci y pa no stroba e investigacion mes.
𝗖𝗢𝗡 𝗧𝗨𝗥 𝗖𝗢𝗦 𝗔 𝗖𝗨𝗠𝗜𝗡𝗦𝗔:
Prome Minister a duna di conoce cu e decision pa cuminsa un investigacion a cuminsa cu un email cu el a ricibi na september 2021 dirigi na henter Conseho di Minister cu copia na cierto Parlamentarionan cu ta haci mencion di posibel iregularidadnan cu por a tuma luga na Arubahuis. “Berdad tabata tin cierto rumornan prome cu esaki.
Tabata tin un e-mail anonimo cu mi a haya un par di luna prome na mei 2021. Un e-mail cu ta bisa cu e ta bin di un grupo di personal di Arubahuis. Mesora mi a tuma contracto cu nan y mi a pidi nan pa duna mi prueba di loke nan ta bisa pasobra e ora mi por tuma accion y investiga. Lamentablemente no a bin niun contesta. Mi a tuma contacto cu hendenan cu mi tabata conoce eynan y tur a bisa mi cu nan no a skirbi e e-mail ey”.
Durante su bishita na Arubahuis recientemente, Prome Minister a ricibi varios comentario di e personal di Arubahuis cu a indica cu nan ta sinti nan mes hopi indigna cu un hende a uza nan nomber pa e e-mail aki manda na mei 2021sin cu nan tin algo di haber. Pero na september 2021 a bin un e-mail cu contenido y Prome Minister mesora a tuma contacto cu CAD, cu DRH y Conseho di Minister pa trata e tema aki y a cuminsa un investigacion inmediatamente na Arubahuis.
Tambe Gobierno di Aruba a manda un delegacion Hulanda pa sigura cu cualkier cos cu no tabata bay bon den e investigacion, cana bon di eynan en adelante. E prome impresion tabata cu mester di refuerso na Arubahuis na comienso di 2022. Gobierno a manda un delegacion consistiendo di un persona di DRH y tambe un begrotingscoordinator di su ministerio.
Mester bisa cu door cu Arubahuis ta na Hulanda, nan sistema financiero ta diferente y no tin acceso inmediato na tur e informacion. Prome Minister a indica cu e conclusionnan preliminar cu a sali eynan despues cu CAD tabata basta leu caba cu e investigacion, ta cu Gobierno mester haci cierto cambionan na Arubahuis. Gobierno a cambia e top di Arubahuis. E investigacion a sigui cana y Gobierno a trece cambionan na Arubahuis cu tabata tin mester pa evita cu e cosnan aki por sigui pasa.
E conclusionnan preliminar e tempo ey ta conclui cu tabata tin 3 persona envolvi cu tabata haci cosnan cu antes tabata normal pasobra esey ta loke nan ta bisa cada biaha den nan defensa. Antes e cosnan ey tabata pasa tambe, pero manera ta ser bisa di nos profesionalnan, “bo mester tin bo compas moral y actua riba dje y no ta pasobra un cos a pasa antes kiermeen e ta bon y abo por continua cu ne”.
Investigacion riba e parti administrativo y financiero a tuma luga di parti di CAD. DRH a haci e parti disciplinario pasobra ta trata di personal den servicio di Gobierno. Esey a caba awor y Conseho di Minister a tuma decision riba cada caso individual y ta considera e ora cu investigacion di parti di Gobierno ta afgerond. “Claro cada persona ainda tin un caminda pa cana pasobra esey no por kita di niun hende, tur hende tin un caminda pa cana pa defende nan mes, un caminda huridico pero esey ta los di loke Gobierno mester a haci”, Prome Minister a duna di conoce.
Prome Minister a sigui bisa cu Gobierno a rond af e onderzoek, tanto e aspecto administrativo y disciplinario y pa e motibo ey tambe por tawata den Parlamento pa duna informacion. Tambe Gobierno a pone e documentonan den man di Ministerio Publico pa determina si tin algo cu a bay contra ley of algo penal, pa haci investigacion e ora riba e parti ey.
Pues di prome momento cu nos a tuma nota di posibel iregularidadnan, mes momento nos a cuminsa investigacion, el a tuma su tempo, mas di loke ami tabata kier sinembargo awor e ta cla y nos a cera e aspecto disciplinario y e ta den man di Ministerio Publico”, Prome Minister Evelyn Wever-Croes a duna di conoce.