Durante su bishita di trabou na Hulanda siman pasa, Minister di Finansa Xiomara Maduro a reuni cu su colega Minister di Finansa di Hulanda sra. Sigrid Kaag hunto cu su conseheronan. E motibo di e reunion tabata pa duna un bista di tur locual Aruba a bin ta haciendo pa por pone nos finansa publico na ordo. Aruba tin un relacion nobo cu Hulanda na unda cu nos a presta placa di Hulanda pa por a surpasa e pandemia. Ta yega momento den aña 2023 cu Aruba mester cuminsa paga e debe aki bek y pesey ta importante pa na Aruba nos por haya un bista di kico e condicionnan di pago lo ta. Cu e meta aki a reuni tambe cu Minister di Finansa di Hulanda pa e mandatario tambe por ta na altura di tur esfuerso cu ta wordo haci na Aruba pa drecha e situacion financiero di nos Pais, y nos intencion pa paga Hulanda e debe bek teniendo cuenta cu Aruba su capacidad di pago. Conforme procedura y palabracionnan actual, Aruba lo continua den dialogo riba e topico aki cu Secretario di Estado Van Huffelen.
