Abatuar di Barber a habri atrobe

Re-apertura ofishal di Abatuar Barber a tuma den ora nan di mainta ku hopi entusiasmo i alegria pa e logro. E re-apertura despues di tres (3) aña a keda risibí ku hopi optimismo di e invitado, koleganan i presentenan.

Den su diskurso sr Arnold Dwarkasing, hefe di Asuntunan Veterinario UO VZ, a indiká ku e renobashon a finalisá pero esaki a bai kompañá ku hopi kontratiempo, empeño i trabou duru di e personal. Marshe di Barber ta konta ku un abatuar moderno i efisiente ku ta konforme reglanan internashonal i un nivel hopi haltu di higiena. Ku e abatuar di Parera i awor esun di Barber e servisio ta garantisá un nivel haltu di karni lokal. Ku e meta i perseveransha pronto tambe por mata porko na Barber.

E abatuar di Marshe di Barber a habri na 1968 pa duna e kriadó di bestianan di área di Banda Bou e fasilidat pa mata bestia mas serka di e bario. Den su diskurso/palabranan sr Boy van Thijss, un kriadó di bestia pa hopi aña, a splika entre otro ku kriadónan di bestia di Banda Bou mester a bin Parera e tempu ei pa laga mata nan bestianan i tabata tin ku bende esaki mesora ku supermerkado i karniserianan. Ku e abatuar banda di e posibilidat di bende ku pueblo na Barber hendenan di Banda Bou a será kabes huntu pa kuminsá kushina i bende kuminda, bèrdura, matanan i produktonan lokal ku e meta pa atrae hendenan di Banda Ariba tambe riba djadumingu. Tambe ela fungi komo un punto di interseptá bestianan hortá ounke no ku tur ora masha a sali afó. Ku e renobashon tumando lugá último añanan hopi kriadó di bestia a sufri di ladronisia di bestia i a hiba un sla fuerte.

Minister sra Dorothy Pietersz-Janga ta felisitá pueblo di Barber i hinter Banda Bou ku e logro aki. For di momentu ku ela bira minister un di su metanan tabata pa e apertura tuma lugá. Biniendo foi un famia kriadó di bestia na Bonairu ela opservá su abuelo mata bestia. Ku un splikashon ekstenso di empleadonan di Asuntunan Veterinario e mes a presensiá kon e prosedura ta tuma lugá i kon e personal ta mata e bestianan di un forma digno i sigur mará na tur reglanan di higiena ku hopi dedikashon di e keurmeesternan. Kòrsou por ta sigur di kome karni saludabel i tambe por ta orguyoso di su Abatuar moderno na Barber.

Abatuar Barber awor ta habrí pa matansa di kabritu i karné riba tur djabièrnè, ménos dianan di fiesta. Pa loke ta e luna aki di dèsember e último dos simannan di desèmber lo mata riba djaweps na Barber. Ta sugerí e kriadónan di bestia pa tene bon kuenta ku esaki. Inisio di matansa di porko na Barber tambe lo ser anunsiá pronto.

Pa fasilitá e proseso operashonal ta introdusí e siguiente kambio: ta pidi tur doño di animal pa mèldu kuantu animal lo trese, no mas lat ku 2 dia di trabou promé, esta e djárason den e mesun siman, ku ta interesá pa sakrifiká animal na Barber. Por mèldu e kùrmester via WhatsApp òf yama +5999 689 1291 i +5999 685 1292. Pa mas informashon por manda un e-mail na info.uovz@gobiernu.cw