Pa cuminsa mi kier manda palabranan di profundo condolencia na famia y sernan keri di e victimanan di violencia den e dianan cu a pasa. Ademas, mi ta desea di ofrece mi condolencia na ful Aruba, pasobra no solamente nos a perde yiunan di tera, pero si no tuma accion, poco poco nos lo ta perdiendo un cualidad esencial di nos pais, cual ta uno di ta un pais safe.
Pa garantisa siguridad riba caya, na clubnan nocturno, y otro hot zones tin diferente factornan cu mester tene cuenta cune y traha riba dje. Un punto cu ta importante pa garantisa esaki ta e infrastructura. Pensa riba por ehempel camera di siguridad, metal detectors, cayanan bon ilumina (lus) y mas. Un otro factor cu ta hunga un rol ta nos leynan. Mester percura pa nos revisa nos leynan, evalua nan y sigur tene na cuenta con esaki ta wordo haci den Reino pa percura cu nos ta na un standard internacional. Un otro factor cu ta sumamente importante pa nos por salvaguardia siguridad pa un tempo largo ta educacion y formacion di nos muchanan na scol, den e barionan, na cas, den famia. Ki guia, norma y balornan, expectativa pa futuro, proteccion, ta wordo duna na e muchanan. Pa por logra garantisa siguridad berdadero y sostenibel pa Aruba e ta rekeri di ful comunidad. Centro di barionan, iglesia, clubnan deportivo, tur tin un funcion hopi importante den formacion di nos hendenan.
Pa cu e casonan specifico di siman pasa mi tin di manda un palabra di pabien na nos Cuerpo Policial cu a haci un bon trabou y a captura e sospechosonan den 1 ora di tempo. Nos ta consciente cu polis tin un tarea grandi pa cu siguridad. Nos sa den Cuerpo Policial na momento aki tin basta demotivacion y e organisacion no ta mucho saludabel. Tin falta di personal cu sigur ta afecta e servicio duna na pueblo. Pe motibo aki mes mi persona a haci e peticion na Minister di Husticia pa nos korpschef nobo bin parlamento pa asina informa nos kico ta e plannan cu e tin pa cu KPA y specificamente con e ta bay sanea nos Cuerpo Policial, hisa e motivacion di e polisnan pa duna e miho servicio posibel na pueblo y con lo bay frena e fenomeno lamentabel cu nos ta mira ta desaroyando. Mi por bisa cu mi ta haya bon feedback di nos korpschef nobo cu sigur ta dunando speransa cu e LO bay nifica algo positivo pa nos kinan na Aruba. Bedrijsvoering, cuido di personal y colaboracion mester ta central den su maneho. Inverti den polis di bario tambe lo contribui na barionan mas safe. Mi lo percura pa e reunion aki tuma lugar y asina parlamento y pueblo por ta nan altura di e ultimo desaroyonan pa cu KPA.
