Mando policial hunto cu Ministerio Publico a informa comunidad cu ta bay actua di forma preventivo pa evita loke cu a pasa den e ultimo siman unda cu dos persona a perde nan bida debi na uzo di arma di candela. E prome tabata dia 30 di november na Tanki na Savaneta y e di dos tabata diadomingo ultimo den oranan di marduga den area di hotelnan grandi.
E prome victima tabata Eddy Rinco Bravo di 19 aña y e di dos Anthony Carty di 31 aña.
Diadomingo den oranan di mainta mando policial a bay den reunion cu Minister di Husticia Rocco Tjon y Procurador General Bote Ter Steege, unda cu a stipula e punto di salida pa un campaña di prevencion. Banda di esun inicia luna pasa unda ta pidi e hendenan entrega arma pa no mester bay prizon, awo por spera cu lo bini cu controlnan intensivo despues di e situacion cu a surgi.
Den e conferencia dirigi pa Alto Comisario Ramon Arnhem, a bisa cu e dos ultimonan sucedidonan a causa hopi impacto riba e pueblo, mas ainda pa e sentimento di insiguridad cu esaki ta trece pa ciudadanonan.
El a priminti di hiba esnan responsabel dilanti mesa berde. Den e prome victima di e prome caso fatal di uzo di arma di candela, a detene varios persona relaciona cu morto di e hoben di 19 aña. Den e di dos caso, unda e victima tin 31 aña, tin un persona deteni. Ta trata di un menor di edad.
El a sigura cu lo actua rapido den tipo di incidentenan asina. Den ambos caso a logra pa den un ora di tempo detene sospechoso. “Un persona cu comete un acto asina, lo no salba di husticia,” Arnhem a sigura den e conferencia di prensa.
Combatimento di uzo di arma di candela ta un prioridad pa KPA. Nan meta ta pa combati esaki via di prevencion. Ta bay cuminsa pa amplia e siguridad via di camera den area di bida nocturno na Noord y lo amplia esaki despues pa otro areanan di acumulacion, pa por reacciona mas rapido riba tipo di incidentenan asina.
PG mr. Bote ter Steege, a expresa su preocupacion pa e hecho cu hopi hoben tin acceso na arma di candela. El a papia di un hecho cu a sosode siman pasa unda dos adulto bisiña tabata discuti cu otro y yiu di un di nan, cu tin apenas 16 aña, a bay paden pa sali bek cu un arma cu el a tira riba e otro persona cu tabata discuti cu su tata. E no por compronde con un hoben of hobennan asina facil tin un arma.