Paisnan grandi den futbol mundial, ta logra nan clasificacion pa e siguiente buelta di Copa Mundial di Qatar 2022, manera entre otro Hulanda, Inglatera, Argentina, Francia, Croacia, Brazil y Portugal mientras cu ayera un di e grandinan cu ta Belgica, a wordo elimina for di e mundial di futbol.
Tabatin temor cu Argentina lo a wordo elimina despues di a perde cu e Saudi Arabia den e prome wega eliminatorio cu anotacion di 2-1 pero logrando triunfonan contra di Mexico cu anotacion di 2-0 y superando Polonia cu mesun marcado aki, e seleccion dirigi pa Leo Messi, Argentina ta clasifica pa e octavo final.
Francia e ultimo campeon mundial, tambe a sigura su clasificacion mientras cu Brasil tambe ta sigura di su clasificacion cu dos triunfo caba mientras cu awe e seleccion di Samba lo hunga contra di Camarun.
Portugal e ekipo di Ronaldo tambe a sigura su clasificacion cu dos triunfo y awe lo mira accion probablemente sin participacion di su delantero Ronaldo, kende tin un lesion leve.
Mexico a conoce un final dramatico diaranson contra di Saudi Arabia ora cu den ultimo minuutnan di wega, ta permiti un gol contra cu a nifica nan eliminacion, ya cu Polonia den mesun grupo, tambe tabatin 4 punto pero pa miho averahe di gol ta logra di pasa tog.
Inglatera ta otro pais grandi den futbol cu a clasifica lider di su grupo cu dos triunfo y un empate hunto cu e ekipo di Merca, cual ekipo den e proximo buelta lo enfrenta e seleccion Oranje, esta Hulanda.
Senegal ta otro seleccion cu a logra su clasifica superando den su ultimo wega e seleccion di Ecuador, cu a conoce un bon mundial pero cu a logra un bon resultado pero no suficiente bon pa su clasificacion.
Argentina a cuminsa malo e mundial y e expectativa tabata grandi cu e lo wordo elimina pero ta trata aki di un seleccion cu ta entre e miho nan di mundo hunto cu Brasil y a logra su clasificacion bou di e presion cu e tin cu gana su dos ultimo weganan, loke el a haci tambe.
Francia e actual campeon mundial a gana su prome dos weganan contra di Australia y Dinamarca cu a sigura su clasificacion, mientras cu e sorpresa grandi den e grupo aki, a bira Australia cu a logra su clasificacion mientras cu Dinamarca a bira e gran decepcion di e grupo aki, logrando solamente un punto den tres partido.
Otro decepcion grandi a bira ayera e eliminacion di Belgica, un ekipo cu hopi a considera di por a bira un finalista den e torneo aki pero e super ekipo aki tra bay cas cu 4 punto, producto di un triunfo y un empate y a mira con e seleccion di Croacia y Marokko ta clasifica prome cu nan.
Ayera Belgica mester a supera Croacia pa ainda clasifica pero simplemente e bisiña di Hulanda, no por a logra esaki.
Te na e momentonan aki, expertonan ta mira Francia e actual campeon mundial y e seleccion di Brasil, como e dos gran favoritonan pa bay cu e titulo pero e serie di octavo final ta conta cu hopi seleccion fuerte cu por percura pa cualkier sorpresa, entre otro e propio seleccion Oranje, Inglatera cu ta anhelando otro titulo mundial.
Otronan cu tambe tin posibilidad grandi pa gana copa ta Spaña cu awe ta mira accion hungando contra di Japon y ta obliga pa gana of empata pa sigura su clasificacion pa e siguiente buelta mientras cu Alemania awe tin cu supera e seleccion di Costa Rica, loke no ta dificil pues ainda nan por logra nan clasificacion.
