Presidente di Parlamento Edgard Vrolijk ta contesta oposicion y ta laga nan sunu.
Secretario General di MEP a sigui e desaroyo riba plataforma politico di cerca. E di dos siman di november Parlamento di Aruba a dedica nan mes pa trata tanto presupuesto 2023 como presupuesto supletorio 2022. Pa loke ta trata oposicion esta AVP-MAS-Accion 21 a keda un total di 8 dia sin presenta den sala di Parlamento pa e debatenan. Lamentablemente tur merdia oposicion tabata pasa busca un cuminda (cu pueblo ta paga) y ta bandona edificio bek, pues sin traha.
Oposicion su rason pa no drenta sala ta wordo desenmascara:
Dia 9 di november AVP-MAS-Accion 21 a manda un carta pa Presidente di Parlamento unda a referi na un carta cu nan a manda 5 di september pa Minister Presidente protestando particularmente cu e presupuesto 2023 cual a wordo entrega na tempo, lo ta falta un di dos conseho tanto di Raad van Advies y tambe CAFT. Tambe oposicion a specula cu e manera cu e proceso a bay ta hasta contra Constitucion esta (Staatsregeling) di pais Aruba y ta mina Parlamento su budgetrecht.
Carta di Presidente di Parlamento a laga oposicion sunu:
Den e carta di presidente di Parlamento cu el a contesta oposicion por escrito 25 di november ultimo el a laga oposicion sunu riba e tema aki. A splica oposicion cu presupuesto 2023 a cana su caminda corecto y a pasa Raad van Advies. A splica tambe cu gobierno berdad a dicidi despues di entrega e presupuesto pa “hold” cu e BTW y na su luga aumenta e BBO cu 1% desde 1 januari 2023. Pa esaki Gobierno mester y a entrega un otro ley (landsverordening) cual a tuma luga y corectamente dia 11 di november 2022 Raad van Advies a duna su conseho referente esaki. Presidente di Parlamento ta suta oposicion den su carta splicando cu “Uitstel di BTW y e voorlopig aumento di BBO di 1% tanto den e memorie van toelichting revisa di presupuesto 2023 como den e nader rapport, ambos a wordo splica y cu e motibo”. Tur e documentacionnan aki a drenta Parlamento di Aruba na tempo y a wordo reparti pa tur Parlamentario incluso esnan di oposicion. Alabes Presidente a splica oposicion cu e presupuesto pa locual ta trata gastonan total di pais Aruba y pues loke Parlamento ta controla y autorisa no tabata tin ningun cambio. Parti entrada solamente ta cambia cu e cambio di BTW pa BBO. Entrada di Gobierno ta wordo regla den otro “landsverordening” esta den “belastingverordening”. Presidente a bay hopi den detaye dunando oposicion un les atrabes di articulonan den Ley. Presidente a ilustra claramente con AVP-MAS- Accion 21 faya totalmente y di berdad no tabata existi ningun rason pa oposicion keda 8 dia sin presenta na trabou. Gobernador di Aruba mientrastanto siman pasa a firma e presupuesto 2023 cu a wordo aproba den Parlamento di Aruba. Por tuma nota cu ta mas un show politico AVP-MAS-Accion 21 kier a arma. Bunita lo ta pa awor oposicion regala Casa Cuna por ehempel e 8 dia di salario cu nan a cobra sin traha pe. Ban mira te na unda nan moral y nan “bon comun” ta di berdad. Pueblo puntra nan unda bo topa nan. Boso a entrega 8 dia di salario cu boso a cobra den november sin traha pe? Tristo pero esaki ta un oposicion sin pariba y sin pabou!