Y no sea conforme e mundo aki, ma sea transforma, pa medio di e renobamento di boso mente, pa boso por comproba kico ta e bon, y agradabel y perfecto boluntad di Dios.( Romanonan 12:2)
Si nos wak rond, nos ta ripara cu tur hende cu ta hunga sabi, y cu ta mara den nan orguyo, arogancia inmoralidad y falta di temor di Dios, mester renoba nan mente. Pesey e evangelio di e reino di Dios mester wordo predica rond mundo.
Nan ta pega den un maldad y te ainda no kier comprende cu esey no ta e boluntad di Dios, pasobra e diabel tin nan mal gara den scuridad.
Un persona no por ta integro si e no a renoba su mente pa e sa cual ta e perfecto boluntad di Dios pa su bida.
Pasobra integridad ta nifica: Para firme y fiel den boluntad di Dios den tur circumstancia ( Daniel capitulo 6 Circumstancia Spiritual ) (Genesis 39:10-14 Hose Circumstancia Sexual y inmoral) y ( Job 2: 9+10 Circumstancia Material, Financiero,Famia y Social).
Un mente cu no ta renoba no por agrada Dios, pasobra e ta un mente carnal y sensual yena cu debilidad y tentacion, y pesey e no ta compronde e cosnan spiritual.( Romanonan 8: 6-7-8).
Un mente no renoba ta manera un tata / mama cu ta bay supermarket pa cumpra cuminda pa su famia, pero ora e yega den supermarket e prome cos cu e ta pone den garoshi ta e caha di cerbes of e botter di whisky grandi , y despues e ta zundra cu cuminda ta caro.
Ta facil pa hende wordo engaña y seduci pa diabel y asina permanece den pica y no renoba nan mente, aunke cuanto aviso, y hasta nan ta wordo roga pa reconcilia nan bida cu Dios pero toch ta keda den scuridad ( Efesionan 5:19-21).
Hende cu no kier renoba nan mente ta biba den sclavitud di scuridad, tur ora pensando cu nan ta wordo descrimina, pasobra nan no kier acepta e libertad cu nan tin den Cristo, asina laga atras e engaño di diabel, pero mas bien ta duna tur clase di cooperacion fisico y mental pa laga e enemigo dirigi nan bida.
Pasobra e prome cos cu bo ta hanja sa ora bo renoba bo mente ta e Berdad, y e ta saca bo for di mentira, pa bo no pretende y adapta bo mes na un bida di mentira, pero pa bo entrega bo mes completa mente na Cristo Hesus, y laga Cristo Hesus goberna bo bida.
Un di e cosnan mas notabel di un hende cu no kier renoba su mente ta: Rebeldia, e no kier acepta coreccion, e kier sigi haci locual cu e kier, aunke e ta bay contra e palabra di Dios, y esey por haci hopi daño na su bida, hogar y famia.
Dios a duna nos autoridad pa no biba den negativismo, nos mester reconoce cosnan negativo, rechasa cosnan negativo, y reemplasa cosnan negativo, y tur esey por wordo haci pa medio di e Palabra di Dios.
Laga tin den boso e actitud aki cu tabatin tambe den Cristo Hesus.
Si un hende ta resisti e palabra di Dios, of ta haci bofon di e palabra di Dios, of ta un cherchado, y no ta balora e principionan di Dios, e no tin e actitud di Cristo den dje, laga nos ta serio, y no gaña otro,pasobra nos mester agrada Dios cu nos bida.
No ta existi bida meymey, tampoco bida neutral, sea bo ta biba pa Cristo Hesus of bo ta biba pa scuridad (Revelacion 3:15+16).