Hulanda ta contribui na desaroyo di estadistica di alta calidad na Aruba
Ministerio di Asuntonan Interno y Relacionannan den Reino ta duna Aruba sosten pa medio di subsidio y intercambio di conocemento pa e asina yama pakete di pais, un acuerdo mutuo cu Aruba y Hulanda a acorda pa motibo di e pandemia di COVID-19. Hulanda ta duna 820 mil dollar na sosten pa bin cu un Sistema Nacional di Estadistica pa Aruba (Nationaal Statistisch Systeem, NSS). NSS tin cuatro obhetivo strategico (1) reenforsa e ley di estadistica, (2) reenforsa e lasonan di trabou pa produccion di estadistica, (3) harmonisacion y standarisacion di sistemanan di data y (4) opleiding pa personal encarga cu produccion di estadistica.
Ministerio di Asunto Economico, Comunicacion y Desaroyo Sostenibel di Aruba a encarga e actual comicion di NSS, cu participacion di Centraal Bureau Statistiek, Departamentonan di Salud Publico, Enseñansa, Labor, Asunto Economico, Comercio y Industria, Naturalesa y Medio Ambiente, Comicion di SDG, Oficina di Censo y Registro Civil y Banco Central di Aruba.
Unabes institui NSS lo keda coordina pa Centraal Bureau voor de Statistiek di Aruba y ta bai forma parti di e NSS hunto cu instancianan cu ta bai produci estadistica oficial. A scoge pa esaki pa produci estadistica di alta calidad, na tempo y relevante pa formacion, monitor y evaluacion di maneho. Estadistica di calidad halto ta necesario pa monitor entre otro e desaroyonan social, economico y medio ambiente di un pais. Ademas e disponibilidad y acceso publico di estadisticanan ta sostene transparencia y responsabilisacion den e proceso di desaroyo di maneho.
Evaluacion di ley
E organisacion di NSS ta cana pareu cu formulacion di ley nobo y adaptacion di ley existente. Esaki ta importante pa e exito di NSS, caminda e rol y responsabilidad di tur participante ta stipula. Banda di esaki e ley ta duna atencion na con ta intercambia data entre e participantenan y con ta protege informacion individual di personanan y entidadnan pa gana confianza di suministrado y usuario. Tambe e cuadro di ley mester duna aporte na reconocemento di estadisticanan oficial, dor di stipula terminonan cla pa e proseso di otorga un marca di calidad na e estadisticanan oficial.