Aruba Lions Club den su aña di celebracion di 75 anniversario, a saka su premionan di rifa di auto y diabierna ultimo a hasi entrega di e premionan na e feliz ganadornan.
Den un exitoso actividad cu un “car show” dilanti club di Aruba Lions na Eagle, den un bon ambiente cu musica di e diferente gruponan di fin di aña, a conclui cu e sakamento di e premionan dilanti di un publico cu tawata presente e atardi aki.
E nombernan ganador a resulta cu e auto electrico pa mucha premio nr 5, a bai pa Carla Martinus.
E “step” electrico, premio nr 4 a bai pa Dylan y Dyeon Arends.
Premio nr 3 cu ta un bicicleta electrico a bai pa un compania di installacion di coriente, despues a sigui pa e premio nr 2 cu ta un “scooter electrico” cu a bai pa Gilbert Dirksz.
Na momento cu a saka e promer premio unda cu e ticket a keda conoci, e la wordo jama dilanti henter e publico cu por a scucha e palabranan jena cu emocion ora cu a informa sra Girigoria Croes di Kas Ariba cu e la gana e auto electrico di Aruba Lions Club.
Asina e 5 ganadornan a keda conoci y mester bisa cu diabierna ultimo e premionan a wordo entrega na e ganadornan den e showroom di All to Car.
Aruba Lions Club sigur mester gradici tur esnan cu a juda den e actividadnan aki, cuminsando cu “All to Car” cu a traha un bon oferta pa Aruba Lions Club por a saka un rifa pa comunidad.
Tambe ALC kier a gradici, e grupo di Classic Car y Musle Car cu a show nan autonan den nan actividad, tambe sr Tom v/d Biezen cu su aporte grandemente, na Tropical Bottling Comp, Elite, sr Lubert Feliciano, Express Events, High Performance, Muchanan di mama Rosa, Robert Thiel y su grupo, Las Unicas y grupo Melodia.
Aruba Lions Club kier mustra cu cada miembro di gruponan y companianan a juda na engrandece un actividad cu ta parti di e ayudo cu ALC mester pa por juda bek den comunidad, pues por concidera bo aporte tambe parti di e trabou voluntario pa comunidad.
Ta gradici tambe tur miembro di prensa cu semper a mustra cu tin porta habri pa Aruba Lions Club y cu sigur ta un parti ecencial den pasa e mensahe pa nos actividadnan por jega den comunidad, y finalmente tur esnan cu a contribui y duna nan sosten na Aruba Lions Club pa asina por sigui cu mas projecto pa esnan cu ta den nececidad den nos comunidad.
Aruba Lions Club lo bai sigui den e proximo temporada cu algun projectonan den comunidad.