Trabou serio ta wordo haci na bienestar di Aruba
Durante tratamento di Presupuesto 2023, Minister di Finansa a entrega un Nota di Cambio pa asina cambia e deficit di 25 miyon pa un surplus di 63 miyon florin cu ta ekivalente na 1%. Di e manera aki Aruba por cumpli cu condicionnan di supervision financiero y na Aruba como den Reino por tin e trankilidad y siguransa cu trabou serio ta wordo haci riba e tereno di finansa publico na bienestar di Aruba.
Ultimo surplus tabata na aña 2019
Minister di Finansa ta consciente cu ta importante pa Aruba por conoce un surplus mirando cu esaki ta para e crecemento di debe cu ya caba ta hopi halto na nos Pais. Pa e motibo aki, desde momento cu Minister Maduro a asumi e responsabilidad como mandatario encarga cu Finansa na aña 2017, a traha na un manera serio pa por a yega na un surplus pa nos Pais. Na aña 2019 a logra esaki caba, pero e pandemia a cambia e panorama financiero completamente. Asina mes a sigui traha na un manera serio y despues di 3 aña di e pandemia, ta bay logra pa den aña 2023 Aruba por conoce atrobe un surplus cu ta cumpli cu locual a keda acorda den cuadro di e supervision financiero na bienestar di Aruba.
Entrada ta subi debi na crecemento economico
E Nota di Cambio ta contene e siguiente cambionan: Basa riba e ultimo pronostico di e ‘Economic Outlook’ di Departamento di Economia, lo adapta e entradanan na e crecemento economico di 6,8%. Compara cu locual a keda entrega na Parlamento anteriormente, ta un subida di 1,7% riba e 5,1% cu a wordo uza anteriormente. Esaki lo trece un entrada adicional di 57 miyon florin.
Introduccion di BBO/BAVP/BAZV na frontera
Pa crea un ‘level playing field’ y teniendo cuenta cu e ineficiencia economico creciente, lo introduci cobransa di BBO/BAVP/BAZV na momento di importa producto (handelsgoederen) na Aruba. E BBO na frontera aki ta premira di drenta na vigor 1 di juni 2023 y lo trece un entrada di 15 miyon florin.
Introduccion di ‘Fondo pa Resiliencia y Innovacion’
E pandemia tabata tin un impacto serio riba e finansa publico y tambe riba e salubridad di nos Pais. Pa por ta bon prepara pa un otro eventualidad, ta introduci un cobransa di 15 dollar na cada bishitante di nos Pais cu lo bay den e ‘Fondo pa Resiliencia y Innovacion.’ E cobransa aki lo bin na luga di e ‘Aruba Travel Insurance.’ Di e entrada aki, 35% lo keda den e fondo y 65% lo bay den caha di Pais Aruba. Pa aña ta premira di haya 25 miyon florin.
Ta baha gasto di Servicio y Producto aun mas den 2023
Banda di cambionan den entrada, ta corta 13 miyon florin extra na gasto den e post di Servcio y Producto di diferente Ministerio. E gastonan ta baha di 217 miyon pa 205 miyon florin.
Trabou serio na bienestar di Aruba
Cu e cambionan proponi den e Nota di Cambio, Presupuesto 2023 di nos Pais lo bay presenta un surplus di 1% cu ta ekivalente na 63 miyon florin. Di e manera aki ta bolbe mustra cu como Minister di Finansa nos ta haci un trabou serio na bienestar di Aruba. Minister Maduro ta gradici e team cu a traha incansablemente pa por a haci e cambionan necesario den Presupuesto 2023. Danki pa kere den Aruba.
