Durante fin di siman a tuma luga e 20 edicion di Aruba Dolphins Invitational na Piscina Olimpico Roly Bisslik na Savaneta. Un total di 312 atleta di 9 diferente ekipo representando 4 pais a bataya pa conkista e premionan maximo. Ekiponan cu a participa ta: B-Train Swimming di Canada, Typhoon Swimming Team, Sithoc Swim Club y Orca Swim Club di Curaçao y Delfins Swimming Club di Bonaire. Giants Aquatics, Stingray Swimming y Aruba Dolphins a representa Aruba. Diadomingo den orannan di atardi mandatario di Deporte tabata presente pa hunto cu Banco di Caribe haci entrega di premio na e gandonan di competencia.
Minister Endy Croes ta felicita directiva di Aruba Dolphins Swimming and Waterpolo cu un exitoso 20 edicion di Aruba Dolphins Invitational. Alabes mandatario di Deporte ta gradici tur patrocinado y boluntario cu a haci di 20 edicion di Aruba Dolphins Invitational posibel. Specialmente palabranan di pabien na tur e landadonan cu a participa y haci e campeonato uno exitoso. Pabien na e ganadonan cu e deseo, disciplina, dedicacion y determinacion boso a logra!
