Awe diabierna den oranan di merdia e locutor mas famoso di Aruba a bay sosega. E tabatin 70 aña cu el a cumpli diadomingo ora cu e tabata den hospital.
Ruben a drenta hospital pa algo di su bista y a haya complicacion y mester a pone na mashin. Su situacion a complica. Dokternan no por a haci nada pe. Gerencia di EA News tabatatin un bon amistad di famia, trabao cu Ruben Garcias for di chikito.
Aki ta sigui su biografia skirbi door di Nos Herencia.
Nr 227 Ruben “ Scorpio” Garcia
Ruben Garcia ta bin di decendencia di Latino America y ta naci dia 30 di Oktober 1952. Bo por imagina cu su signo zodiacal ta Scorpio.
Ruben Garcia ta casa cu Teresa y tin dos yiu muher.
Ruben su carera como DJ a cuminsa na Juni 1970 como un operador na Radio Kelkboom. Un dia cu tabata falta un locutor Ruben Garcia a tuma e reto na radio.
Na 1971 Ruben Garcia tabata Prins di carnaval y asina a haya confiansa pa presenta su mes den publico.
Na 1971 Ruben Garcia a bin cu e idea di bin cu Scorpio’s Disco na Ex Surfside awe Nikky Beach.
Na 1976 Ruben Garcia ta uni cu e stacion di radio Voz di Aruba y na 1989 Ruben ta uni su mes cu Canal 90 ariba frecuencia di FM.
Na 1981 Ruben Garcia ta bira promotor y ta logra trece diferente artista di fama mundial bin duna concierto na Aruba.
Na 2002 Ruben Garcia ta drenta den servicio di e radio Magic Fm 96.5.
Actualmente Ruben Garcia ta director y socio di Power FM 101.7
Ruben Garcia ta conoci pa animador di tur clase di evento, semper tabata e animador di e programa di Carnaval Aki Aya, presentador di e programa di Carnaval Riba bou sin conta programanan di Pasco na television local.
Ruben Garcia a cumpli 50 aña den farandula na aña 2020.
Na su esposa Teresa, su yiunan, famia y Aruba hopi forsa. Cu Ruben descansa na paz.
