Djasabra mainta tempran Wardakosta a detektá un boto sospechoso den serkania di Kòrsou. E Sentro di Operashon Marítimo di Wardakosta mes ora a dirigí un boto patruyero Metal Shark den direkshon di e boto sospechoso.
Una bes na yegada na e sitio e tripulantenan di e boto patruyero di Wardakosta a mira un boto ku kuater persona na bordo. Despues di investigashon mas djaserka di parti di Wardakosta a resultá ku e kuater hòmbernan aki tabatin paketenan di droga den nan posishon. A hiba e boto i e hòmbernan di nashonalidat Venezolano na e pir di Wardakosta, na unda nan a keda entregá
na Kuerpo Polisial Kòrsou. A haña un total di 440 kilo di droga, di kual mas o ménos 192 kilo kokaina i 248 kilo mariwana, e droga aki a ser destruí. Kuerpo Polisial Kòrsou ta bai sigui ku demas investigashon.
Wardakosta lo siguí patruyá pa asina kontrolá e fronteranan marítimo di Kòrsou. E patruyanan lo vigilá i protehá e fronteranan di transportenan di droga, trafikashon di hende i di arma. Abo komo suidadano alerta tambe por yuda Wardakosta. Na momento kubo mira algu sospechoso òf peligroso riba laman òf na kosta, bo por informá Wardakosta riba e number 913 òf via whatsapp 510 0913. E numbernan akí ta alkansabel di dia i anochi.
