Tourism Corporation Bonaire (TCB) a organisá su promé Town Hall Meeting anual dia 24 di òktober 2022 na Plaza Beach and Dive Resort.
Diputado di Desaroyo Ekonómiko i Turismo, Hennyson Thielman i direktor di TCB, Miles Mercera, a tene presentashon durante e seshon di town hall.
Segun diputado Thielman a implementá e vishon di un solo barku krusero pa dia komo parti di e Plan di Rekuperashon di Turismo, pa haña un mihó ekilibrio entre turismo, moveshon di karga, preshon riba e aspektonan úniko di nos isla i e retonan relashoná ku nos medio ambiente. Tur esaki komo konsekuensia di kresementu di tantu e kantidat di turista komo e kantidat di habitante na nos isla. Bienestar di nos komunidat lokal, kompetensia hustu, maneho di gruponan grandi di hende (crowd management) i guianan turístiko i dunadónan di servisio sertifiká ta hunga un ròl krusial den e vishon pa desaroyo di turismo krusero na nos isla. Mas aleu diputado Thielman a hasi uso di e oportunidat di e cruise town hall meeting pa komprendé posibel preokupashonnan i pa risibí fitbèk di e partnernan den e industria, entre otro mehorashon di e fasilidatnan di e terminal krusero, tualèt públiko i un plan di bòrchi di indikashon di ruta na nos isla pa un mihó ‘crowd management’ i mehorashon di infrastruktura.
TCB, representá pa Miles Mercera, a kompartí informashon tokante e kantidat di barku krusero ku a bishitá nos isla entre sèptèmber 2021 i sèptèmber 2022. En total 149 barku krusero a bishitá nos isla ku en total 212.964 pasahero krusero. Segun e turistanan krusero sambuyamentu, ‘landsailing’ i bai snòrkel ku katamaran ta nan eksperensianan tòp pa loke ta trata ekskurshon. Banda di esakinan e amabilidat di nos habitantenan boneriano a haña e skor mas haltu di nos bishitantenan.
TCB a elaborá mas aleu riba lansamentu di e wèpsait nobo i algun proyekto ku ta na kaminda relashoná ku e industria krusero, manera e proyekto di WiFi, stènt di informashon nobo i e proyekto di bòrchi di indikashon di ruta, djis pa menshoná algun.
For di luna di novèmber TCB ta introdusí un programa di enkuesta, e asina yamá ‘exit survey’ pa bishitantenan krusero, ku kua nan por duna fitbèk tokante nan eksperensia na nos isla. Pa medio di yena e enkuesta nan tin chèns pa gana un biahe bèk pa nos isla.
E promé Cruise Town Hall Meeting tabata bon bishitá pa mas òf ménos 70 hende ku ta traha den sektor di barku krusero. Nan tabatin hopi pregunta i nan ta hopi entusiasmá tokante futuro.
