Komo parti di su programa di aña pa luna di òktober, Fundashon Alzheimer Bonaire a organisá un anochi di informashon pa miembronan di famia i interesadonan den sala di Konferensia di Captain’ s Don Habitat, djasabra 22 di òktober último, 19.00 or. Tabata un presentashon di sr. Roderick Groenman, direktor di Groenman Legal & Consultancy B.V. i eksperto den lei notarial. E Tema tabata “Levenstestament – Wilsbekwaamheid – Volmacht”.
E tópiko aki ta masha aktual i nos Fundashon ta konsiente ku tin masha pregunta i nesesidat pa tipo di informashon asina, pero lástimamente, pa motibu ku nos mester a kambia e fecha, hopi di esnan invitá i tambe tur e personanan ku ta interesá no por a bishitá e anochi aki. Sinembargo tòg Direktiva por mira bèk riba un anochi informativo eksitoso, durante di kual preguntanan dje presentenan por a keda kontestá satisfaktoriamente. Presentenan tabata mashá agradesido pa e oportunidat brindá na nan.
