Mayor- i mayornan di kriansa di muchanan di 3 te ku 17 aña ku tin mester di kuido intensivo na Hulanda Karibense, ta bin na remarke pa un kompensashon di 1437 dòler. Minister Schouten (maneho di pobresa, partisipashon i penshun) a primintí e kompensashon akí pa kompensá e kompensashon pa yu dòbel struktural ku lo introdusí asina ku finalisá e trayekto legislativo. E periodo di petishon pa e kompensashon ta di promé di novèmber te ku 30 di dezèmber 2022.
E areglo temporal ta konta pa mucha ku tin mester di guia intensivo, komo konsekuensia di un malesa òf enfermedat. Por ehèmpel riba tereno di higiena korporal, limpiesa korporal, kome i bebe, mobilidat, komportashon i kuido médiko. Mayor- i mayornan di kriansa ku tin kustodia riba muchanan ku di promé di novèmber te ku 30 di dezèmber 2022 tin òf ta kumpli 3 aña di edat (t/k 17 aña) i ku tin derechi riba kompensashon pa yu na Hulanda Karibense, por entregá un petishon.
Na Boneiru, e evaluashon médiko si un mucha tin mester di kuido intensivo ta sosedé via Sentro Akseso. Na Sint Eustatius esei ta sosodé via e Klínika di Prevenshon di GGD i na Saba via e departamento di salubridat públiko.Ta klasifika ku e nesesidat di kuido ta intensivo, ora muchanan tin mester di kuido intensivo diario riba diferente tereno. E espektativa ta ku esaki ta konta pa máksimo 5 porshento di e muchanan na Hulanda Karibense. Solamente den kaso di un evaluashon médiko positivo, unidat SZW di RCN lo por paga e kompensashon di 1437 dòler. Esaki ta un montante bruto.
Kon pa entregá petishon?
Por entregá petishon desde promé di novèmber te ku 30 di dezèmber 2022. Na Boneiru esaki por riba dianan di trabou entre 8’or di mainta i 4.30 ‘or di atardi na Sentro Akseso òf via meil aanvraagkindzorg@aksesobon.com.
Anochi di informashon pa mayor- i mayornan di kriansa ta tuma lugá riba 1 di novèmber di 6’or di atardi pa 8‘or di anochi na ofisina di dòkter di kas na Rincon i riba 2 di novèmber di 6’or or di atardi pa 8‘or di anochi na Sentro Akseso na Kralendijk. Despues di un splikashon di e dòkter di salú hubenil, mayornan por hasi pregunta i haña yudansa pa yena e formularionan.
Na Sint Eustatius por entregá petishon pa medio di un sita na Prevention Clinic via e number di telefòn (+599) 318 2891.
Na Saba por entregá petishon na departamento di Community Development, riba djaweps di 2’or te ku 4’or di atardi.
Mayor-/mayornan di kriansa por akudí na e organisashonnan menshoná ariba pa e formulario i pa ayudo pa yena nan, pa pregunta tokante e evaluashon médiko i eventual guia kuido di e mucha. Tambe por haña tur informashon, e formulario di petishon i e kuestionario médiko online via www.rijksdienstcn.com.
