Den e promé mitar di 2022, kompará ku e aña anterior, a bin un biaha i mei mas tantu turista
Sint Eustatius i Saba via avion. Na mes momento, e kantidat di turista ku a bishitá Boneiru via
avion a bira tres biaha mas tantu; e kantidat aki tabata 10 porshento mas altu ku e promé mitar
di 2019. Esaki a bira evidente via e último sifranan di CBS.
Den e promé mitar di 2022, aproksimadamente 2,4 mil turista a yega Sint Eustatius ku avion.
Esaki ta un biaha i mei mas tantu kompará ku mes un periodo di e aña anterior (1,4 mil), pero
ainda aproksimadamente mitar di e kantidat di turista ku a bishitá e isla den e promé mitar di
2019. Esaki por ta e resultado di e kantidat di moveshon di transporte aéreo ku ta
aproksimadamente tres kuart di e kantidat di tres aña promé.
Den e promé mitar di 2022, e parti di turista Merikano tabata 16 porshento, miéntras ku na
2019, 2020 i 2021 esaki tabata kada bia mas òf ménos 11 porshento. Mientras ku relativamente
mas turista Merikano a bin, tabatin relativamente ménos turista di Repúblika Dominikana i
Aruba, Kòrsou i Sint Maarten.
Mas turista na Saba den e prome mitar di aña kompará ku 2021
E kantidat di turista ku a bishitá Saba den e promé semèster di 2022, ta meskos ku na Sint
Eustatius, mas òf ménos 2,4 mil. Esaki tambe ta mas ku 1 biaha i mei e kantidat den e mes un
periodo e aña anterior. No opstante e oumento, e kantidat di turista ta aproksimadamente mitar
di e kantidat ku a bishitá e isla den e promé mitar di 2019. Remarkabel ta e kantidat di e
moveshon di transporte aéreo di i pa Saba tabata na e nivel di 2019 òf asta mas ku esaki. Aunke
aproksimadamente e mes un kantidat di buelo tabata bai i bin di Saba, e buelonan aki tabata
transportá ménos turista ku na 2019.
E parti di Hulandes di e kontinente Europeo ku a bai Saba tabata un 27 porshento mas tantu ku e
añanan anterior. Tambe aki relativamente ménos turista a yega di e islanan Hulandes bisiña. Na
2019, nan parti ainda tabata 29 porshento, miéntras ku pa e promé mitar di 2022 esaki tabata 20
porshento.
