E tabata un momento historico den e trayectoria di Aruba Karate Bond (AKB) ora cu riba diahuebs 13 di october 2022 e prome curso nacional pa arbitro y coach a wordo duna. Esaki a tuma luga na Hyatt Place Business Center den un esfera hopi agradabel y positivo. Directiva di Aruba Karate Bond, bou presidencia di Felix Tromp, ta felicita instructor “sensei” Gustavo Velasquez pa su tremendo aporte pa prepara y duna e curso na un total di 16 participante. E participantenan ta miembro di AKB di e organisacionnan SKIF Aruba, RyuBuKai Aruba y Shotokai Aruba, esta Shawn-Carl Solagnier, Tiana Tromp, Juan David Velasquez, Genesis Tromp, Jeshua Mejia, Olga Guaitarilla, Mariana Rodriguez, Edith Shaw Vargas, Bachera Marin, Andrés Piña, Lipika Motwani, Frederik Quandus, Jean Pierre Winterdaal, Jesus Calderon, Kyran Tromp y Zillion Brugés.
Contenido di curso
E curso aki a abarca tur e reglanan di e Organisacion Mundial di Karate (WKF). Tambe e curso a inclui diferente tips pa ‘kumite’ (combate entre karatekanan) y ‘kata’ (tecnica di karate y combate imaginario) dividi bou di e funcion di sea arbitro of coach. E curso a keda finalisa pa medio di un examen unda 4 participante a slaag como arbitro, 9 como coach y 3 ta di seleccion (Jeshua Mejia, Kyran Tromp y Zillion Brugés) kende a participa como un prueba (midimento) di nan conocemento teorico pa asina nan ta bon prepara ora di participa na campeonatonan.
Gradicimento
Directiva di Aruba Karate Bond ta felicita tur participante y ta informa cu nan ta den preparacion pa e dia special unda lo haci entrega di e certificadonan. Finalmente, directiva ta gradici su grupo di boluntario cu semper ta yuda pa ehecuta e tipo di eventonan aki.
