Start intercambio(nan) cultural ‘nobo’ ta definitivo

Street Painting workshops exitoso di Gustave Nouel na artistanan di tur nivel, cu National Institute of Arts (NIA) a organisa na Sint Maarten y un mural colectivo na Belair Beach Hotel, hunto cu algun workshop y un masterclass den bailamento cu Arlene Halley a duna na centro di arte Kunstcircuit na Deventer, tabata instrumental pa stimula e intercambio cultural ‘nobo’ na 2023. Esaki lo a cuminsa na 2020, si no tabatin Covid y lockdown…
April 2023 e prome intercambio cultural di diferente disciplina di arte entre kunstcentrum Kunstcircuit  (www.kunstcircuit.nl) y NIA (www.nationalinstituteofarts.com) lo bira realidad. Si e pilot project aki cu Sint Maarten ta un exito, intercambio cultural cu Aruba na 2024, lo ta un proximo soño pa realisa. Ya tin cierto palabracion y plan pa esaki.

Directora di NIA na Sint Maarten, sra Arlene Halley, ta un bailarina internacional, cu a cuminsa baila na Aruba (caminda ela nace) y tambe tabatin du mes scol di baile na Venezuela, na Merca (USA) y na Sint Maarten, prome cu, hunto cu Clara Reyes, ela funda Centro di Arte NIA, na Philipsburg diez aña pasa. Ademas di baile riba nivel maximo, NIA ta stimula Arte Visual, Musica, y Teatro. Y tambe arte interdisciplinario y experimental, mescos cu na Kunstcircuit di Deventer. (www.kunstcircuit.nl) caminda Gustave Nouel ta duna workshops di pintamento.
Si e pilot intercambio aki ta un exito, tin plan concreto pa cuminsa cu un intercambio ‘grassroot’ similar den nos Reino na Aruba, Korsow y/o Bonaire, cuminsando na 2024 (tambe cu intercambionan entre e islanan)

Algun tempo pasa Gustave a ofrece Tito Bolivar un mural inspira pa ‘Climate Change’ y tambe pa duna workshops di ‘Streetpainting’ na Aruba Art Fair, si ta posibel. Curator, Renwick Heronimo cu lo focus riba historia (di arte) Arubano, a invita Gustave pa bin expone na Art Fair’22.

Gustave ta spera cu, durante Art Fair’22, tambe lo por presenta su pintura ARUBAN PRANK AND PRIDE, pa prome biaha na Aruba. ARUBAN PRANK AND PRIDE a ser presenta oficialmente, den Pabellon Hulandes na Worldexpo’92, Sevilla. Intencion di Gustave  ta pa laga ARUBAN PRANK AND PRIDE atras na Aruba pa collection di e Museo Arubano cu fundacion ARA kier logra na 2024, si Art Fair logra trece y mustra e pintura ‘historico’ aki pa prome biaha na Aruba… Un pintura universal, inspira pa nos identidad, orguyo y pa nos ‘STATUS APARTE’ !!