Un brasa grandi diki gordo acompanja pa mi mihor deseonan pa un dushi y bon dia yen di sabiduria den nos alegria ! Cu nos dushi isla sigui ta bendiciona cu e proteccion di nos Creador di Amor y cu cada famia tin ariba mesa nan pan di cada dia. Shonnan permiti’mi, mi tin cu skirbi algo atrobe di Koyari. E lugar di fe cu a conquista nos curason. E lugar di paz y amor.
Ora e curason ta yen, full full, e boca ta papia. Y akinan ta boca y curason ta papia.
Un bunita experiencia di e bunita y dushi celebracion di Vidente Valerie su di 24 anja den sirbishi di Dios y su prohimonan cu hopi amor y dedicashon. Mi ta cuminsa pa gradici Sra. Vanny pa su excellente manera profeshonal cu curason di e fantastico Video clipsnan cu a ser pasa hunto den un solo presentacion cu pauze chikito , duna oportunidad di esnan na palabra y despues otro video clip, asina bunita y cu no unicamente nos bista, pero tambe nos curason por a sinti e dushi alegria , un harmonia perfecto. Un excelente harmonia ekilibra .
Pa Lady Ruth e bunita anochi aki, di asina hopi inspiracion, a cuminsa caba den auto, riba caminda pa Koyari, acompanja pa su bunita y talentoso amiga Poeta Angele Martinez declamando varios bunita poema, Angele, cu ya ta hopi conosi na Aruba, hopi biaha hunto cu gran amigo ruman Jhon Freddy Montoya sacando potret. Bunita potret ! E biaha aki, Angele a bin pa saca potret di e momentonan impresionante y inolvidabel di e anochi aki na Koyari, mientrastanto Jhon Freddy recuperando di un kebrante di salud. Amor y salud pa’bo lieve Jhon Freddy!. Un grupo respeta di fielnan y of creyentenan y of personanan cu tambe a bin pa sinti y comparti e dushi paz y trankilidad cu ta reina riba e tereno bunita bendiciona aki. Na nos yegada caba, nos por a scucha e dushi musica di piano di e.o. nos kerido Juan Chabaya Padu Lampe y nos por a canta cu nos curason tambe of den vos, e dushi segundo himno di Aruba, e dushi wals “Abo so “ y tambe “Atardi Aruba ta bunita “. Nos amigo ruman Gilbert cu a anuncia e comienzo di e programa, un programa di kita sombre ! Speechnan y oracionnan y poemanan cu a sigui, cu tambe a toca cada curason. E mensahe di fe positivo educativo informativo cu hopi amor di Vidente Valerie mes, cu ta pone nos realisa, cosnan cu ta pasando, pa nos tambe participa den nos mesun bienestar y pa nos cuminsa planta den nos mesun cura. Cosnan cu ta birando mas caro y un crenchi mas complica den bida rond mundo. E importancia pa nos sigui cuida di otro. Cu su lema nobo pa stima otro ! Un anochi precioso cu un programa preciosisimo ! Sra. Vanny, we love you ! You’re the best !! Boso tin un tremendo team ta traha den union y bunita hermandad. Danki pa tur locual boso ta hasi den fe cu humilde curason!
Un programa cu un bon balans, y no cu solamente tokenan religioso, pero cu tokenan cultural di alta nivel. Oh ki bunita pa a wak e parti di Andre Riue den e video clipsnan , Sra. Vanny , “you are the blessings”. Vidente Valerie ta demonstra asina su amor y passion pa musica clasico den conciertonan unico y bunita, manera e dos cancionnan den e idioma italiano cu curason por a sinti. Despues e dushi snacknan, prepara cu hopi amor y carino pa miembronan fiel y creyente di Koyari, cu semper ta duna di curason. Cu Dios mes multiplica esakinan bek den formanan bunita y bendiciona na boso cada un ! Ainda mi ta wak tur e bunita lusnan dornando e bunita crus grandi ariba e stage y tur e otro lusnan na banda, rondo di e crus den dje e potret banner grandi di San Francisco di Asis y cada imagen tambe tur na lus. Un anochi bello di luz paden y pafor !
Un bunita anochi cu a recorda y menciona tambe San Francisco di Asis. E rumannan den Christo cu a hiba palabra, cu a para keto tambe un rato riba e situacion doloroso di e morto di e 4 personanan recientemente pariba di brug. Y e rumannan cu nan bunita oracion di gradicimento.
Ohala nos tur por ta un instrumento di Paz, Amor y Fe. Laga nos sigui resa pa nos enemigonan. Satanas kier tin su man malo den bida di esnan di fe cu ta felis. Tin envidia, pero Lady Ruth tambe ta kere cu tin mas bon cu malo. Tin cu sa perde nan strea di nort y kier causa danjo na otro pa motibo di nan mesun falta di paz y felicidad. Ohala nan hanja nan caminda bek na Dios. Lady Ruth ta hopi gradicido cu a habri e bunita cas spiritual y curason p’e na Koyari, na unda ela sinti su mes bon bini . Koyari, bunita Koyari, na unda ta reina Paz, Amor y Trankilidad. Koyari, bunita Koyari, cu ta un paraiso riba nos paraiso Aruba. Danki na Bon Dios pa cada un alma cu ta bishita e lugar precioso aki. Sigui boso mesun ritmo di curason, tin hopi actividad bunita , scoge pa bo mes, no mester cansa e mente y alma, tumele suave. Ora por bay, bay, ora tin cosnan familiar esakinan tin prioridad, Tata Dios no ta rabia si bo no por atende tur actividad tur ora. Nos por sirbi nos Bon Dios den famia tambe. Pero ta dushi topa cu hendenan di fe y amor y comparti esaki cu otro. Pabien lieve Valerie, pabien y danki pa ta un bon Vidente pa Aruba. Dios mediante, na caminda pa bo 25 anjanan, otro anja na luna di Oktober.
Sigui briya y luci riba bo caminda cu no ta un caminda di Roza so, pero cu de ves en cuando un sumpinya pa sigui tene nos focus ariba e Roza di Saron, nos Hesus, nos Mama Maria y Tata Dios. Vidente Valerie, bo ta den nos curason y oracion. Nos tambe ta stima’bo. Modanza y Koyari ta stima’bo.
Y abo ta stima Modanza y Koyari. Abo sa kiko ta amor pa prohimo ruman. Abo ta amor. Padilanti bo ta sigui bay ! Bida ta brasabo, bida ta stima’bo, carga pa Hesus.
Danki Aruba, pa lesa nos relato di amor awe dedica na Koyari. Stay safe y Love you too !
