Murmuracion y kehamento ta un forma di demostra ingratitud na Dios, cu bo no ta satisfecho cu locual Dios a haci pa bo.
Murmuracion y kehamento por mantene bo den stress y depresion pa hopi tempo, pasobra cu bo actitud negativo bo ta demostra, falta di respet pa Dios, mirando Dios su bondad, toch bo ta sigi keha demostrando cu e cos no ta na bo smaak of manera bo kier.
Pa motibo di desobedencia, rebeldia, murmuracion y kehamento ( Numbernan capitulo 14 completo y Deuteronomio 1:2) e pueblo di Israel a pasa 40 anja den desierto caminda nan mester a pasa den 11 dia.
Hopi hende no ta tene cuenta cu locual nan ta papia di Dios, ni tampoco con nan ta trata Dios, pero Dios ta mustra bon cla den e buki di Numbernan cu murmuracion ta trece morto, y ta hopi hende a muri den desierto pa motibo di murmuracion. ( Numbernan 14:11).
Awendia nos ta mira bida di hende ta keda manera un auto den neutral, e no ta bay dilanti y e no ta bay patras , keto bay den mesun situacion, bisando cu tempo ta malo, cos ta malo, tirando falta y culpando otro, sin sa cu ta den murmuracion nan ta, y cu murmuracion ta veneno pa bida di hende.
Si bo kier sali for di un situacion ,ferfelo, delicado, of hasta penoso, tin un formula cu Dios ta duna nos, pa nos stop di murmura y expresa Fe y e ta bisa lo siguiente den Filipensenan 4:6 : No preocupa pa nada: Ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios,y e pas di Dios cu ta surpasa tur comprondemento, lo warda boso curason y boso mente den Cristo Hesus.
E peliger di murmuracion ta cu bo por traha 2 of 3 trabao y te ainda placa no ta yega, pasobra bo no ta agradecido pa locual cu bo tin.
Haci tur cos sin murmura ni discuti, pa boso por proba boso mes di ta sin culpa y inocente, yuinan di Dios sin reproche meymey di un generacion corumpi y perverso, entre cualnan boso ta briya manera lusnan den mundo.( Filipensenan 2:14-15)
Murmurcion ta pica, murmuracion ta destrui hende su Fe, y esey ta locual diabel kier logra, pa bo duda, y no ta agradecido di locual Dios a haci pa bo.
Imaginabo cu despues cu Dios a habri Laman Corra pa e pueblo sali for di Egypto, ora nan tabatin hamber y sed nan a bisa ,cu ta mihor nos a keda den Egypto, y esey a lanta furia di Dios, despues di come mana nan tabata kier carni, y asina nan a sigi murmura, y Dios bisa cu nan lo muri den desierto.
E palabranan cu bo ta expresa den direccion di Dios ta determina, con lihe lo bo sali for di problema, of cuanto tempo lo bo keda aden, con lihe bo relacion cu bo famia lo drecha, of cu bo mes boca bo ta destrui tur cos.
Mas oracion, mas gradicimento, y menos palabra negativo, kehamento, y murmuracion y mas lihe bo mira lus den bo scuridad, pasobra bo Fe ta hiba bo na bo bendicion.
Laga boso karakter ta liber di amor pa placa, y sea contento cu loke boso tin, pasobra e mes a bisa:
Nunca lo mi bandonabo, y nunca lo mi laga bo desampara.( Hebreonan 13:5)
Murmuracion tambe por hinca bo salud mental den peliger, y bo ta wordo cura ora bo bira agradecido na Dios.
Pasobra tin un gran bendicion, pa esnan cu ta papia bon di Dios di nan curason.
