Sigur un bishita importante caminda nos por a comparti cu nos grandinan, scucha loke ta preocupa nan y intercambia di idea. Di mi banda mi a gradici nan pa nan aporte na crea e Aruba di awe y pone pa nos e fundeshi cu ta haci awe tur cos posibel.
Alabes mi a indica cu nos ta preocupa pa e situacion encuanto poder di compra y retonan cu nan ta encontra diariamente. Mi a comparti cu nan cu mi ta di opinion cu nan merece un bida digno y cu pesey mes nos Fraccion ta constantemente den contacto cu Gobierno encuanto e reformanan adando caminda nos ta urgi pa tene debido cuenta cu e grupo meta aki.
Durante e encuentro aki cu nan mi a accentua e hecho cu pa Gabinete Wever-Croes nos grandinan ta hopi importante y recientemente hasta a lanta un Departamento special dirigi riba nan. Alabes mi a comparti cu nan un recapitulacion specifico di parti di e reforma fiscal cu ta trata nos pensionadonan:
- Pensioen di biehes lo aumenta entrante 1-1-2023 cu 35 florin pa luna
- Reparatie toeslag di pensionado lo aumenta entrante 1-1-2023 cu 45 florin pa luna
- Tarifa di impuesto riba pensioen ta baha cu 2% entrante 1-1-2023
- Suma liber di impuesto ta aumenta te na Afl. 30.000 (2500 pa luna) entrante 1-1-2023, kiermen solamente esnan cu tin un pensioen mas halto cu 30.000 lo paga impuesto, y den e caso ey e tarifa lo wordo reduci.
- Peso di impuesto riba pensioen di parehanan casa lo bira menos entrante 1-1-2023, pasobra lo no conta nan hunto mas.
E bishita aki a yena nos cu energia y mi por bisa cu sigur e tawata un bishita hopi ameno cu a brinda nos e oportunidad pa por combersa cu e miembronan di e Grupo Kawara.
