Suzan Overmeer, coordinador di e estudio “Docent Muziek” na Koninklijk Conservatorium di Den Haag recientemente a haci un bishita di cortesia na Minister Plenipotenciario Suplente mr. Ady Thijsen.
Durante di e combersacion sra. Overmeer a conta cu na maart ultimo hunto cu e studiante Arubiano Shannon Bueno a haci un bishita di trabao na Aruba pa haya un bista di e situacion cu docente di musica na Aruba. Despues di a topa y papia cu diferente persona na Aruba a constata cu e nesesidad pa docentenan di musica den educacion musical na Aruba ta hopi grandi. For di Koninklijk Conservatorium a duna presentacionnan na hobennan pa trece nan riba e idea pa un futuro como docente di musica. Segun sra. Overmeer lo ta mas logico si tin hobennan Arubiano cu por wordo educa como docente di musica.
Tambe a keda constata cu lo mester bin sosten na e docentenan di musica cu actualmente ta dunando les na e scolnan na Aruba, cu ta hopi motiva pero cu tiki background pedagogico. Un manera cu por brinda sosten segun señora Overmeer ta pa medio di stage di studiantenan di Koninklijk Conservatorium. Actualmente tin dos studiante cu ta den tres aña di estudio cu ta interesa pa core stage na Aruba. Mirando cu un stage asina pa un periodo largo ta trece hopi gasto cune. Señora Overmeer a bisa Minister Thijsen cu e ta buscando financiamento pa haci e stage aki posibel.
E mandatario a bisa cu e ta haya hopi importante e interes for di Koninklijk Conservatorium pa educacion musical na scolnan na Aruba y tambe e intercambio riba e mundo di musica di Aruba, specialmente pa loke ta trata e musica folklorico di Aruba ta positivo. Sr. Thijsen a mustra señora Overmeer riba kisas posibilidadnan for di fondonan Europeo. Mirando como cu su persona ta Representante di Aruba na Union Europeo y den e funcion aki tin hopi di haber cu OCTA elo sondea e oportunidadnan cu por tin cu Union Europeo of OCTA por contribui financieramente cu e proyecto aki.
Finalmente señora Overmeer a gradici minister Thijsen pa e combersacion hopi ameno y como recuerdo a haci entrega di un ehemplar di Kunstzone, cu ta un revista riba arte y cultura den enseñansa pa cual su edicion number 5 ta dedica na educacion musical na e islanan Caribense Hulandes.