E kremp ekonómiko na Boneiru tabata 8,4 porshento na 2020. Esaki ta e bahada di mas grandi for di komienso di e seri aki na 2012. Na Sint Eustatius i Saba e bbp a baha ku respektivamente 25,9 porshento i 6,3 porshento. CBS ta informá tokante esaki a base di sifra nobo.
E bbp den preis real na Boneiru ta, kompará ku Saba i Sta Eustatius, esun di mas grandi, ku 505 mion US dòler den 2020, siguí pa Sint Eustatius ku 89 mion US dòler. E bbp di preisnan real na Saba tabata 44 mion US dòler na 2020.
Prinsipalmente hóreka i kultura i rekreashon na Boneiru a risibí gòlpi mas duru pa motibu di prohibishon di entrada
E balor agregá di hóreka a baha ku 53,5 porshento debí na e kremp konsiderabel di turista ku ta drenta. Na Boneiru e frontera tabata será pa turista for di 14 di mart 2020. Riba 2 di yüli 2020 e promé avion for di Oropa a bolbe baha na Boneiru. Pa otro pais e fronteranan tabata será mas largu. Pa e motibu aki e kantidat di bishitante a baha ku kasi 60 porshento na 2020. Turismo krusero tambe a paralisá for di mitar di mart. E kantidat di pasahero di krusero a baha konsiderabel ku 60 porshento den 2020. Hóreka pa un gran parti di aña tabata habrí pa komunidat lokal.
E prohibishon di entrada a sòru tambe pa un kremp grandi den sektor di kultura, deporte i rekreashon. E balor agregá a baha ku 43,1 porshento. Den sektor di rekreashon e bahada tabata mas grandi bou di skolnan di sambuyá i kasinonan.
Den ramo di negoshi di transporte, informashon i komunikashon e situashon ta miksto. Bou di taksista, kompaninan ku ta hür boto i otro kompanianan di transporte e balor agregá a baha konsiderablemente, miéntras ku kompanianan di telekomunikashon i IT a presta bon. E balor agregá di e ramo di negoshi di transporte, informashon i komunikashon a baha ku 7,5 porshento.
Tambe den komersio e situashon ta miksto. Establesimentu ku ta bende material di konstrukshon i tambe supermerkadonan a presta bon, kontrali na otro área di komersio manera joyerianan, tienda di regalo ku ta mas dependiente di e entrada di turismo ku si a sufri un bahada. E balor agregá di komersio a baha ku un 5,5 porshento.
Tin tambe industria na Boneiru di kua e balor agregá a subi na 2020. E balor agregá den konstrukshon a subi ku un 8,5 porshento. Den sektor di edukashon tabatin un subida di 4,8 porshento pa motibu di oumento di alumno den edukashon primario i tambe sekundario. Den maneho públiko (3,2 porshento) tabatin un subida debí na e kantidat di kupo di trabou ku a subi kompará ku aña 2019. E balor agregá di e sektor di kuido a subi ku 2,1 porshento pa motibu di e èkstra entrada risibí dor di kuido relashoná ku COVID.
Kremp fuerte na Sint Eustatius
E kremp ekonomikó fuerte di 25,9 porshento na Sint Eustatius ta debí na prinsipalmente algun kompania grandi riba e isla. E kompanianan aki ta produsí
prinsipalmente pa eksportashon i ta dependé di desaroyo regional di e sektor di petroli. Debí na e pandemia di corona no tabatin petishon pa krudo i tampoko almasenamentu di krudo den region.
Na Sint Eustatius tambe tabatin prohibishon di entrada na 2020. E turismo ku ta drenta via avion a baha ku kasi un 70 porshento i tabatin komo konsekuensia un bahada den e balor agregá di e industria hotelero i e sektor di kultura i rekreashon.
Esaki ta e di tres aña konsekutivo ku e bbp di Sint Eustatius ta baha. Den komparashon ku 2017, e volúmen di e bbp di Sint Eustatius a baha ku un 40,1% na 2022, i di 142 mion dòler pa 85 mion dòler (na preisnan di 2017). Esaki tin diferente kousa/motibu. Na 2018 e orkan Irma a kousa daño grandi na e isla. Na 2019 desaroyo regional den e sektor petrolero a afektá vários kompania grandi gravemente i konsekuentemente e oferta pa almasenamentu di petroli a baha i na 2020 e pandemia di corona a presentá.
Ounke ku negoshi ku pa gran parti ta dependé di e oferta pa petroli den region tin influensia grandi riba e bbp, e tin un influensia limitá riba e entrada nashonal. No ta konta ganashi di e negoshinan aki den e entrada nashonal, dor ku e negoshinan aki ta pertenesé kompletamente na akshonista estranhero. E negoshinan aki ta kontribuí prinsipalmente na entrada laboral riba e isla.
Bahada fuerte di turismo ta kontribuí na e kremp na Saba
E balor agregá den hóreka, kultura i sektor di rekreashon a baha pa motibu ku turista no por a bini Saba debí na e pandemia di corona. E kantidat di pasahero via avion i barku (tambe fèri) a baha na Saba ku un 70 porshento na 2020. Tambe tabata hür ménos kamber na studiante. Por lo tantu e bbp di Saba a kai ku un 6,3% na volúmen. E mayor bahada for di inisio di e seri na 2012.
